ژیری ده‌ستكرد بیركردنه‌وه‌ی ڕه‌خنه‌یی ده‌كوژێت و مرۆڤ ته‌مه‌ڵ ده‌كات

ئیرادە میدیا

به‌ پێی لێكۆڵینه‌وه‌یه‌كیی زانستی نوێ پشتبه‌ستنی ناهۆشیارانه‌ به‌ ژیری ده‌ستكرد ده‌بێتە هۆی له‌ناوچوونی به‌هره‌ی بیركردنه‌وه‌ی ڕه‌خنه‌یی له‌لای به‌كارهێنه‌رانی.

به‌ پێی ئه‌و لێكۆڵینه‌وه‌یه‌ی كه‌ تیمێك له‌ زانایانی مایكرۆسۆفت و زانكۆی كارنیگی میلۆن پێی هه‌ستاون، متمانه‌ی زیاده‌ڕۆیانه‌ به‌ ئامرازه‌كانی ژیری ده‌ستكرد ئەو هەوڵە مەعریفیانەی تاکەکان دەیده‌ن بۆ تەواوکردنی ئەرکەکان کەمدەکاتەوە، ئەوەش ده‌شێت وایان لێبکات کەمتر توانای بیرکردنەوەی ڕەخنەگرانەیان هەبێت.

لیڤ تانکێلێڤیچ، لێكۆڵه‌ری پێشه‌نگ له‌ مایكرۆسۆفت ڕیسێرچ و یه‌كێك له‌ نوسه‌رانی لێكۆڵێنه‌وه‌كه‌ ڕایگه‌یاند، ژیری ده‌ستكرد ئه‌گه‌ر به‌ شێوه‌یه‌كی ڕاست به‌كاربهێنرێت ده‌كرێت ببێته‌ ئامرازێك بۆ به‌هێزكردنی بیركردنه‌وه‌ی ڕه‌خنه‌یی، ژیری ده‌ستكرد ده‌كرێت ببێته‌ هۆی هێنانه‌ئارای بیرۆكه‌ی نوێ، هه‌روه‌ها پاڵنەر بێت بۆ بینینی نادیاره‌كان و شته‌ چاوه‌ڕواننه‌كراوه‌كان و ڕووبه‌ڕووبوونه‌وه‌ی گریمانكراوه‌ پێشوه‌خته‌كانمان له‌باره‌ی شته‌كانه‌وه‌.

به‌ڵام تانکێلێڤیچ، پێی وایه‌ بۆ به‌ده‌سهێنانی ئه‌م سوودانه‌ ده‌بێت توانای ئه‌وه‌مان هه‌بێت ژیری ده‌ستكرد وه‌ك "هاوبه‌شێكی" بیركردنه‌وه‌ بۆ خۆمان دابنێین، نه‌ك ته‌نیا وه‌ك ئامرازێك بۆ پێدانی زانیاری به‌ خێرایی.

لیڤ تانکێلێڤیچ،ئاماژه‌ی به‌وه‌داوە كه‌: " به‌شی سه‌ره‌كی له‌ چاره‌سه‌ر ئه‌وه‌یه‌ شێوازێك به‌كاریبهێنین كه‌ ببێته‌ هانده‌ری بیركردنه‌وه‌ی ڕه‌خنه‌گرانه‌ نه‌ك به‌شێوه‌یه‌كی نه‌رێنی و پاسیڤانه‌ پشت به‌ زیره‌كی ده‌ستكرد ببه‌ستین".

تانکێلێڤیچ، پێی وایه‌ كه‌ ده‌توانرێت ئه‌مه‌ بكرێت ئه‌ویش به‌ فه‌راهه‌مكردنی ڕووكاره‌ شه‌فافه‌كانی ژیری ده‌ستكرد به‌شێوه‌یه‌ك ڕێگه‌ به‌ به‌كارهێنه‌رانی بدات له‌وه‌ تێبگه‌ن كه‌ ئه‌م زیره‌كی ده‌ستكرده‌ چۆن گه‌شتووه‌ به‌ ئه‌و "ڕایه‌-ئه‌نجامگیرییه‌"، هه‌روه‌ها بتوانن له‌ ڕاست و دروستی ئه‌و ئه‌نجامگیرییه‌ بكۆڵنه‌وه‌".

لێكۆڵینه‌وه هاوبه‌شه‌كه‌ی مایكرۆسۆفت ڕیسێرچ و زانكۆی كارنیگی میلۆن له‌سه‌ر 319 كه‌سی پسپۆڕ كراوه‌، ده‌ریخستووه‌ به‌رزبوونه‌وه‌ی ئاستی متمانه‌كردنیان به‌ ژیری ده‌ستكرد تا ئاستێكی زۆر بووه‌ به‌هۆی كه‌مبوونه‌وه‌ی هه‌وڵه‌ تایبه‌ته‌كانیان بۆ به‌ده‌ستهێنانی زانیاری.

لێكۆڵینه‌وه‌كه‌ گه‌شتووه‌ به‌و ده‌رئه‌نجامه‌ی كه‌ ئه‌و كه‌سانه‌ی به‌ بێ هیچ گومانكردنێك له‌و زانیاریانه‌ی ژیری ده‌ستكرد ئه‌یانداتێ مه‌یلێكی كه‌متریان هه‌یه‌ بۆ موماره‌سه‌كردنی بیركردنه‌وه‌ی ڕه‌خنه‌گرانه‌، له‌به‌رامبه‌ردا ئه‌وانه‌ی متمانه‌یه‌كی زیاتریان به‌ توانا كه‌سییه‌كانی خۆیان هه‌یه‌ توانایه‌كی زیاتریشیان له‌ بیركردنه‌وه‌ی ڕه‌خنه‌گرانه‌دا هه‌یه‌".

ئه‌و به‌كارهێنه‌رانه‌ی كه‌ پێشوه‌خت زانیاریییه‌كی بنه‌ڕه‌تی و باشیان هه‌یه‌ له‌بواری ئه‌و بابه‌تانه‌دا هه‌یه‌ كه‌ كاری له‌سه‌ر ده‌كه‌ن، ده‌توانن به‌شێوه‌یه‌كی چاكتر هه‌ڵه‌ی زانیارییه‌كانی ناو ژیری ده‌ستكرد یان كه‌مووكورتییه‌كانی ئاشكرا بكه‌ن، به‌ پێچه‌وانه‌ی ئه‌وانه‌وه‌ كه‌ زانیاری پێویستیان له‌و بوارانه‌دا نییه‌ كه‌ له‌ ژیری ده‌ستكردی داوا ده‌كه‌ن، ئه‌وانه‌ ناتوانن به‌ چاوێكی ڕه‌خنه‌گرانه‌وه‌ له‌ ئه‌نجامگیری و زانیارییه‌كانی ژیری ده‌ستكرد بنواڕن".

تانکێلێڤیچ، ڕوونیده‌كاته‌وه‌ كه‌ "زۆر له‌و به‌كارهێنه‌رانه‌ی كه‌ زانیاری پێویستی پێشوه‌ختیان له‌و بوارانه‌دا نییه‌ كه‌ ژیری ده‌ستكرد ئه‌یانداتێ ده‌شێت گومان له‌ ئه‌نجامگیرییه‌كان بكه‌ن به‌ڵام ناتوانن هه‌ڵه‌كان ڕاست بكه‌نه‌وه‌".

لێكۆڵینه‌وه‌كه‌ گه‌شتووه‌ به‌و ده‌رئه‌نجامه‌ی كه‌ هه‌موو ئه‌و كه‌سانه‌ی كه‌ متمانه‌یه‌كی زیاده‌ڕه‌وانه‌یان به‌ ژیری ده‌ستكرد هه‌یه و له‌بری پشتبه‌ستن به‌ زانیارییه‌كانی خۆیان و شیته‌ڵكردنی كه‌سی خۆیان و ماندووبوون و هه‌وڵدانی زۆر، ته‌نیا پشت به‌ ته‌كنه‌لۆجیا ده‌به‌ستن‌ ده‌شێت ببێته‌ هۆی دابه‌زاندنی ئاستی مه‌عریفییان.

ده‌مێكه‌ مرۆڤ پشت به‌ نموونه‌ پێشینه‌-كۆنه‌ جیاوازه‌كانی ژیری ده‌ستكرد ده‌به‌ستێت وه‌ك ژمێر- حاسیبه‌، ئامرازی دیاریكردنی شوێن-جی پی ئێس، له‌ پێناو كه‌مكردنه‌وه‌ی زه‌حمه‌تی گه‌ڕان و به‌ده‌ستهێنانی زانیاری و زووترن گه‌شتن به‌ مه‌به‌سته‌كانیان.

به‌ڵام نموونه‌ تازه‌ و پێشكه‌وتووه‌كانی ژیری ده‌ستكرد، كه‌ شیكاری ئاڵۆز به‌رهه‌مده‌هێنن ده‌كرێت ئاستێكی نوێی مه‌ترسی زیاد بكات، چونكه‌ به‌كارهێنه‌ران ده‌شێت ئه‌و ئه‌نجامانه‌ی ژیری ده‌ستكرد ئه‌یانداتێ به‌ بێ پێداچوونه‌وه‌ یاخود لێكۆڵینه‌وه‌ په‌سه‌ند بكه‌ن.

بۆ ڕزگاربوون له‌مه‌، لێكۆڵینه‌وه‌كه‌ پێشنیازی ئه‌وه‌ ده‌كات كه‌ گه‌شه‌پێده‌رانی نموونه‌ جیاوازه‌كانی ژیری ده‌ستكرد ده‌بێت ژیرییه‌ك دیزاین بكه‌ن كه‌ هه‌ڵگری ئه‌وه‌ بێت به‌كارهێنه‌رانی هان بدات بۆ پێداچوونه‌وه‌ به‌ ده‌رئه‌نجامه‌كانی له‌بری ئه‌وه‌ی یه‌كسه‌ر وه‌ك خۆی قبوڵی بكه‌ن.

تانکێلێڤیچ وتی: نموونه‌ی ژیری ده‌ستكردی وه‌ك Perplexity زۆر گرنگه‌، چونكه‌ ئه‌وه‌ بۆ به‌كارهێنه‌رانی ڕوون ده‌كاته‌وه‌ چۆن گه‌شتووه‌ به‌و ده‌رئه‌نجامه‌ی كه‌ ده‌یدات به‌ به‌كارهێنه‌رانی، بۆیه‌ ده‌بێت نموونه‌ جیاوازه‌كانی ژیری ده‌ستكرد ڕووكاری وای تێدا بێت كه‌ به‌كارهێنه‌ران هان بدات پێداچوونه‌وه‌ به‌ ده‌رئه‌نجامه‌كان بكه‌ن نه‌ك ڕاسته‌وخۆ قبوڵی بكه‌ن.

ناوه‌ڕاستی سه‌ده‌ی بیسته‌م سه‌ره‌تایه‌كی گرنگ بوو بۆ خه‌یاڵی داهێنانی ته‌كنه‌لۆجیایه‌ك كه‌ لاسایی مرۆڤ بكاته‌وه‌ له‌ بیركردنه‌وه‌ و هه‌ڵگرتنی زانیارییه‌كانی و لێكدانه‌وه‌ و شیته‌ڵكردنی به‌ڵام به‌كات و هه‌ڵه‌ و هه‌وڵدانێكی كه‌متر.

سه‌ده‌ی بیست و یه‌ك، نموونه‌ یان مۆدێله‌ جیاوازه‌كانی ژیری ده‌ستكرد به‌شێوه‌یه‌كی خێرا له‌ گه‌شه‌سه‌ندندان و وڵاتان و كۆمپانیا گه‌وره‌كانی ئه‌و بواره‌ له‌ ململانێییه‌كی سه‌ختدان بۆ گه‌شتن به‌ چاكترین و به‌هێزترین مۆدێلی ژیری ده‌ستكرد، به‌ڵام وه‌ك شاره‌زایان پێیان وایه‌ ژیری ده‌ستكرد، گه‌رچی پێشكه‌وتنێكی به‌رچاوی له‌ چاره‌كی یه‌كه‌می ئه‌م سه‌ده‌یه‌دا به‌ده‌ست هێناوه‌ به‌ڵام ده‌كرێت هه‌موو نموونه‌كانی كه‌ ئێسته‌ پێگه‌شتووه‌ وه‌ك گاگۆڵكێكردنی منداڵێكی ساوا ببینرێت له‌چاو ئه‌و ئاستانه‌ی له‌ ئاینده‌دا ژیری ده‌ستكرد پێی ده‌گات و وا چاوه‌ڕوان ده‌كرێت سه‌رجه‌م بواره‌كانی ژیانی مرۆڤ بگرێته‌وه‌، و شوێنی زۆر له‌كاره‌كان كه‌ تائێستا مرۆڤ به‌ ته‌نیا به‌ هه‌وڵه‌ هزرییه‌كانی خۆی ئه‌نجامی ده‌دات بیگرێته‌وه‌، و نموونه‌گه‌لێك له‌ ژیری ده‌ستكرد بێته‌ ئاراوه‌ كه‌ توانای ئه‌وه‌ی هه‌یه‌ كاره‌ گرنگه‌كانی وه‌ك نه‌شته‌رگه‌ری، دۆزینه‌وه‌ی چاره‌سه‌ری نه‌خۆشییه‌كان، هه‌روه‌ها شیته‌ڵكردنی ئه‌نجامی تاقیگه‌كان كه‌ ئێسته‌ هه‌موو ئه‌و نموونانه‌ هه‌ن، به‌ڵام له‌ له‌ سه‌ره‌تادان.

هه‌روه‌ها له‌بواری گواستنه‌وه‌دا پێشبینی ده‌كرێت نه‌ك هه‌ریارمه‌تیده‌ر بێت له‌ شۆفێریدا به‌ڵكو خۆ ببێت به‌ شۆفێر و ڕووداوه‌كانی هاتوچۆ كه‌م بكاته‌وه‌، له‌ بواری بازاڕیشدا ببێته‌ پێشه‌نگی به‌ بازاڕكردن و پیشاندانی هه‌ل و ده‌رفه‌ته‌ گونجاوه‌كانی به‌ بازاڕكردنی سه‌ركه‌وتووانه‌، له‌ بواری شیته‌ڵكردن و خوێندنه‌وه‌ی ده‌ق و داڕشتنی ده‌قی داهێنه‌رانه‌شدا ده‌كرێت هه‌نگاوی گرنگ هه‌ڵبێنێت، ئه‌مه‌ جگه‌ له‌ یارمه‌تیدانی مرۆڤ بۆ ده‌ستڕاگه‌شتنی به‌ زیاترین زانیارییه‌ سروشتی و گه‌ردوونییه‌كان.