زیاتر لە چوار ملیۆن كەس بۆ عاشورا هاتونەتە عێراق

وه‌زاره‌تى ناوخۆى عێراق لە نوسراوێكى فەرمیى دا داتاى سەردانیكەرانى "عاشورا" و "چلەى ئیمام حوسێن"ى بڵاوكردەوەو ئاماژە بەوە دەكات كە لەو رێوڕەسمە ئاینییانەدا چوار ملیۆن و سەد هەزار كەس لە 140 وڵاتى جیهانەوە بەشدارییان كردوەو زۆرینەشیان لە وڵاتى ئێرانەوە هاتون.

لە نوسراوە فەرمییەكەى ئەمڕۆى وەزارەتى ناوخۆى عێراق دا هاتوە، عێراق لە پێشوازیكردن لەو ژمارە سەردانیكەرە سەركەوتو بوە.

هاوكات دەقى نوسراوەكە بە ناوى عەقید "عەباس بەهادلى" بڵاوكراوەتەوە، كە وتەبێژى فەرمى وەزارەتەكەیە.

 لە ساڵنامەی ئیسلامیدا، عاشورا دەیەمین ڕۆژی مانگی موحەڕەمە و ڕۆژێکە گرنگییەکی تایبەتی ئایینی هەیە بۆ موسڵمانان، كە تێیدا سوننەكان یادی ڕزگاربونی موسا و گەلەکەی لە دەستی فیرعەون دەکەنەوە، شیعەکانیش یادی شەهیدبونی ئیمامى حوسێنی کوڕی ئیمامى عەلی لە شەڕی کەربەلا دەکەنەوە.

هەرچى یادى چله‌ى "ئیمام حوسێن"ى كوڕى عه‌لى ئه‌بو تاڵیبە، دەكەوێتە كۆتاییەكانى مانگى (صفر) واتا چل رۆژ دواى یادى شەهیدبونەكەى ئیمامى حوسێن، و به‌ گه‌وره‌ترین رێوڕه‌سمى مسوڵمانانى شیعه‌ داده‌نرێت و ساڵانهش‌ له‌ عێراق به‌ڕێوه‌ده‌چێت، كە تێیدا سەردانیكەرانى شیعە لە زۆربەى وڵاتە ئیسلامییەكانى جیهانەوە بۆ رێوڕەسمەكە سەردانى شارى كەربەلا دەكەن.