کۆشکی سپی دەستپێکردنەوەی دانوستاندنە ئەتۆمییەکان لەگەڵ ئێران ڕەتدەکاتەوە

ناوەندی هەواڵ

ڕێکخەری پەیوەندییە ستراتیجییەکانی ئەنجومەنی ئاسایشی ئەمریکا دەستپێکردنەوەی دانوستانە ئەتۆمییەکان لەگەڵ ئێران دوای هەڵبژاردنی سەرۆکایەتیی ئەو وڵاتە ڕەتکردەوە و دەڵێت، واشنتن پێی وانییە  ئێران دوای گۆڕنکاری سەرۆکی وڵاتەکە هەڵسوکەوتی خۆی بگۆڕێت.

جۆن کێربی، ڕێکخەری پەیوەندییە ستراتیجییەکانی ئەنجومەنی ئاسایشی ئەمریکا ڕایگەیاندووە، حکومەتی ئێران هێشتا پشتیوانی لە گرووپەکانی حیزبوڵڵا، حەماس و میلیشیاکانی حوسییەکان دەکات، بۆیە دوورە دانوستاندنەکانی تایبەت بە بەرنامە ئەتۆمییەکانی ئێران دوای هاتنەسەرکاری سەرۆکی نوێ گۆڕانکاریی بەسەر بێت.

پێشتر مەسعود پزیشکیان، سەرۆک کۆماری نوێی هەڵبژێردراوی ئێران لەکاتی  بانگەشەی هەڵبژاردن بۆ سەرۆک کۆماری ئێران رایگەیاند، تا ئێران بە ڕووی جیهاندا نەکرێتەوە دانوستانەکان دەستپێناکەنەوە، کێشە ناوخۆییەکان و  هەڵئاوسانی ئابووریی وڵاتەکەش چارەسەر نابێت.

لەلایەکی دیکەوە، کۆشکی سپی لە چەند ڕۆژی ڕابردوودا ئاماژەی بەوەکرد، بەرنامە ئەتۆمییەکەی ئێران تەوەری سەرەکیی گفتوگۆی نێوان بایدن و کییەر ستارمەر، سەرۆک وەزیرانی نوێی بەریتانیا دەبێت.