لیژنەی دارایی پەرلەمانی عێراق: مەترسی لەسەر مووچەی فەرمانبەران نییە

ناوەندی هەواڵ

ئەندامێکی لیژنەی دارایی لە پەرلەمانی عێراق دەڵێت، وەزارەتی دارایی عێراق مانگانە پێویستی بە زیاتر لە حەوت ترلیۆن دینار هەیە بۆ دابینکردنی مووچەی سەرجەم فەرمانبەران. 

دەشڵێت، مووچەی فەرمانبەران بە تەواوی دابینکراوە و مەترسی دواکەوتنی لەسەر نییە.

موعین کازمی، ئەندامی لیژنەی دارایی لە پەرلەمانی عێراق ڕایگەیاندووە، بانکی ناوەندیی عێراق بەردەوامە لە دابینکردنی پارەی کاش بۆ خەرجکردنی مووچەی فەرمانبەرانی عێراق لە وادەی خۆیدا بە هەرێمیشەوە، هاوکات بۆ دابینکردنی قەرز و پێشینەکان بۆ هاووڵاتییان بەبێ جیاوازی.

بەوتەی ئەندامەکەی لیژنەی دارایی، وەزارەتی دارایی عێراق مانگانە پێویستی بە حەوت ترلیۆن دینار هەیە بۆ ئەوەی مووچەی سەرجەم فەرمانبەران بە هەرێمی کوردستانیشەوە دابین بکات، مووچەی فەرمانبەران بە تەواوی لە بودجەدا دابین کراوە و هیچ مەترسییەک لەسەر دواکەوتنی نییە.

وتەکانی موعین کازمی، ئەندامی لیژنەی دارایی لە پەرلەمانی عێراق لە کاتێکدایە نزیکەی 50 ڕۆژە فەرمانبەرانی هەرێمی کوردستان مووچەیان وەرنەگرتووەو تا ئێستاش دیار نییە کەی چووچە وەردەگرن و حکومەتی هەرێمی کوردستان و وەزارەتی داراییش چاوەڕێن لەبەغداوە پارە بێت و مووچە دابەشبکەن.