پەرلەمانتارێک: ناردنی مووچەی مانگی ئاب پەیوەستە بە چارەسەرکردنی کێشەکانی نێوان هەولێر و بەغدا

ئەندامێکى لیژنەى دارایى لە ئەنجوومەنى نوێنەرانى عێراق چەند زانیارییەک لەبارەى مووچەى مانگى هەشتى فەرمانبەرانى هەرێم ئاشکرا دەکات و دەڵێت، ناردنی مووچەی مانگی ئاب لەلایەن بەغداوە پەیوەستە بە چارەسەرکردنی کێشەکانی نێوان هەرێم و عێراق.

نەرمین مەعرووف، ئەندامی لیژنەی دارایی پەرلەمانى عێراق رایگەیاند، وەزارەتی دارایی هەرێمی کوردستان لیژنەیەکی پێکهێناوە بۆ ئەوەی لەگەڵ وەفدى وەزارەتی دارایی عێراق گفتوگۆ لەسەر کێشەکان بکەن، ناردن و دابەشکردنی مووچەی مانگی ئابى فەرمانبەرانی هەرێمی کوردستان پەیوەستە بە خێرایی چارەسەرکردنی کێشە ھەڵپەسێردراوەکانی نێوان ھەرێمی کوردستان و عێراق.

لە هەرێمى کوردستان هیچ وادەیەک بۆ دابەشکردنى مووچەى مانگى هەشت دیارینەکراوە، لە کاتیکدا بەغدا پارەى ئەو مانگەى مووچە خۆرانى هەرێمى ناردووە و بڕیارە هەر ئەمڕۆ وەفدێکى  وەزارەتی دارایی عێراق بە سەرۆکایەتى تەیف سامى سەردانی ھەرێم بکات بە مەبەستى تاوتوێی ئەو کێشە و تێبینیانەى، کە لە لیستی مووچەدا ھەن.