نرخى بلیتى فرۆكە بۆ لوبنان گران دەبێت

هاوڵاتییانى لوبنان بەتایبەت ئەوانەى دانیشتوى دەرەوەى وڵاتى خۆیانن؛ ناڕەزایەتى توند سەبارەت بە گرانكردنى بلیتى فڕۆكە بۆ وڵاتەكەیان دەردەبڕن.

لەمبارەیەوە، ژمارەیەك لە خاوەن نوسینگەكانى گەشتیاریى لە بەیروتى پایەتەخت بۆ كەناڵى ئەلعەرەبییە ئاشكرایانكرد؛ نرخى ئێستاى بلیتى فڕۆكە لە دەرەوەى وڵاتەوە بۆ ناو لوبنان بە ڕێژەى 40% دا زیادیكردوە كە ئەوەش نرخێكى خەیاڵییە.

خاوەن نوسینگەكان هۆكارى گرانبونى نرخەكە بۆ زۆریى خواستى گەشتكردنى هاوڵاتییە لوبنانییەكانى دەرەوەى وڵات دەگێڕنەوەو پێیانوایە؛ ژمارەى گەشتەكان بۆ ناوخۆ زیادیكردوەو گرانیى بلیتەكانیش هەمو كۆمپانیا گەشتیارییەكان دەگرێتەوە نەك بە تەنها كۆمپانیاى فڕۆكەوانى رۆژهەڵاتى ناوەڕاست.

لەلایەكى ترەوە لایەنە پەیوەندیدارەكانى لوبنان لە رونكردنەوەیەكدا ئاماژەیان بەوەداوە؛ كە نرخى بلیتى گەشتكردن لەناوخۆى وڵاتەوە بۆ دەرەوەى وڵات؛ هیچ گۆڕانكارییەكى بەسەردا نەهاتوەو وەك خۆى ماوەتەوە.