حه‌ماس و ئیسرائیل لێدوانی جیاواز ده‌ده‌ن له‌باره‌ی كوژرانی ده‌یان كه‌س، له‌ سه‌ره‌ی وه‌رگرتنی هاوكارییه‌كاندا

ناوەندی هەواڵ

دوای كوژرانی ده‌یان كه‌س و برینداربوونی ده‌یانی تر، له‌ سه‌ره‌ی هه‌زاران كه‌سیی وه‌رگرتنی هاوكارییه خۆراكییه‌كان، له‌ شاری ڕه‌فحی باشووری كه‌رتی غه‌ززه‌، هه‌ریه‌كه‌ له‌ حه‌ماس و ئیسرائیل لێدوانی جیاواز ده‌ده‌ن.

به‌ره‌به‌یانی ئه‌مڕۆ یه‌كشه‌ممه‌ (1ی حوزه‌یرانی 2025)، دوای بانگه‌وازی سوپای ئیسرائیل بۆ دابه‌شكردنی هاوكارییه‌ خۆراكییه‌كان به‌سه‌ر هاوڵاتیانی غه‌ززه‌دا، كه‌ له‌ لایه‌ن كۆمپانیایه‌كی ئه‌مریكییه‌وه‌ سه‌رپه‌رشتی ده‌كرێت، هه‌زاران هاوڵاتینی فه‌ڵه‌ستینی ڕه‌وشتن به‌ره‌و شوێنی دابه‌شكردنی هاوكارییه‌كه‌، به‌ڵام پاش ماوه‌یه‌ك سوپاس ئیسرائیل ئاگربارانیكردن، به‌ پێی لێدوانی ته‌ندروستی كه‌رتی غه‌ززه‌، له‌و ڕووداوه‌دا، ٣٥ هاوڵاتی كوژراون و نزیكه‌ی ٢٠٠ی دیكه‌ش برینداربوون.

بزوتنه‌وه‌ی حه‌ماس له‌باره‌ی ئه‌م ڕووداوه‌وه‌ به‌یانێكی بڵاوكرده‌وه‌ و گوتی: "ئه‌م قه‌سابخانه‌ دڕندانه‌یه‌ به‌ڵگه‌یه‌كی تره‌ بۆ نیشاندانی سروشتی فاشیستانه‌ی داگیركه‌ر و ئامانجه‌ تاوانكارییه‌كانی، چونكه‌ ئیسرائیل ناوه‌نده‌كانی دابه‌شكردنی خۆراك كه‌ له‌ژێر ده‌ستی خۆیدان وه‌ك ته‌ڵه‌یه‌ك ده‌بینێت بۆ ڕاكێشانی برسییه‌ بێتاوانه‌كان و پاشان گوله‌بارانكردن و ئیهانه‌كردن و كه‌رامه‌تشكاندنیان".

هه‌روه‌ك حه‌ماس به‌رپرسیارێتی ئه‌م ڕووداوه‌ و له‌ناوبردنی گه‌لی فه‌ڵه‌ستین و برسیكردنی هاوڵاتیانی كه‌رتی غه‌ززه‌ی خسته‌ ئه‌ستۆی ئه‌مریكا و ئیسرائیل.

به‌ڵام ئیسرائیل له‌سه‌ر زاری "ئه‌فیخای ئه‌درعی" وته‌بێژی سوپای وڵاته‌كه‌وه‌ ڕه‌تیكرده‌وه‌ هیچ زانیارییه‌كی دروستیان له‌باره‌ی قوربانیانه‌وه‌ هه‌بێت له‌و ناوچه‌یه‌ی هاوكارییه‌كانی لێ دابه‌ش ده‌كرێت.

هه‌روه‌ها ئه‌فیخای ئه‌وه‌شی گوت كه‌ "ئه‌م بابه‌ته‌ له‌ژێر لێكۆڵینه‌وه‌دایه‌".

به‌ڵام ڤیدیۆ و وێنه‌كان كه‌ هاوڵاتیانی ئه‌و كه‌رته‌ بڵاویان كردۆته‌وه‌ پیشانی ده‌دات كه‌ ده‌سڕێژی گوله‌ له‌و خه‌ڵكه‌ ده‌كرێت‌ و به‌هه‌زارانی دیكه‌ش له‌ شوێنی ته‌قه‌كردنه‌كه‌ هه‌ڵدێن.‌