ئه‌گه‌ڕ ڕۆژێكی ته‌واو شه‌كر و ئارد نه‌خۆیت، چی به‌سه‌ر جه‌سته‌دا دێت؟

ناوه‌ندی هه‌واڵ

دووركه‌وتنه‌وه‌ له‌ خواردنی شه‌كر وئارد بۆ ماوه‌ی 24 كاتژمێر، ئه‌زموونێكه‌ شایسته‌ی ئه‌وه‌یه‌ تاقیبكرێته‌وه‌، به‌هۆی ئه‌و سوده‌ زۆرانه‌ی كه‌ به‌ جه‌سته‌تی ده‌گه‌یه‌نێت.

پێگه‌ی (Times of india) ڕاپۆرتێكی ته‌ندروستی له‌باره‌ی سوده‌كانی ته‌نیا یه‌ك ڕۆژ دووركه‌وتنه‌وه‌ له‌ خواردنی ئه‌و دوو بابه‌ته‌، بڵاو كردۆته‌وه‌.

 ئه‌و سودانه‌ی بڵاوی كردوونه‌ته‌وه‌ به‌مشێوه‌یه‌یه‌:

1- هاوسه‌نگبوونی شه‌كری خوێن
شه‌كری خوێن دوای نه‌خواردنی شه‌كر بۆ ماوه‌ی شه‌و و ڕۆژێكی ته‌واو، سه‌قامگیرییه‌كی چاك به‌خۆیه‌وه‌ ده‌بینێت، چونكه‌ خواردنی شه‌كر ده‌بێته‌ هۆی به‌رزبوونه‌وه‌ی شه‌كری ناو خوێن، ئه‌مه‌ش پاڵ به‌ په‌نكریاسه‌وه‌ ده‌نێت بۆ به‌رهه‌مهێنانی ئه‌نسۆلینی زیاتر. 
له‌گه‌ڵ به‌رده‌وامبوونی به‌رزبوونه‌وه‌ی شه‌كری ناو خوێن، به‌رگری ئه‌نسۆلین له‌ جه‌سته‌دا زیاد ده‌كات، ئه‌مه‌ش ده‌بێته‌ هۆی توشبوون به‌ شه‌كره‌ له‌ جۆری دووه‌م.

2- ده‌ركردنی ئه‌و شله‌یه‌ی له‌ جه‌سته‌دا په‌نگی خواردۆته‌وه‌
دووركه‌وتنه‌وه‌ له‌ شه‌كر بۆ 24 كاتژمێر، هانی جه‌سته‌ ده‌دات بۆ دووباره‌ به‌كارهێنانه‌وه‌ی گلایكۆجینی خه‌زنكراو له‌ جگه‌ر و ماسولكه‌كاندا، ئه‌مه‌ش له‌پێناوی ده‌ستكه‌وتنی وزه‌، ئه‌م پرۆسه‌ش یارمه‌تی گورچیله‌ ده‌دات، له‌ ڕێگه‌ی میزكردنه‌وه‌، له‌و ئاوه‌ زیاده‌یه‌‌ ڕزگاری بێت كه‌ له‌ جه‌سته‌دا هه‌یه‌. 

3- كه‌مبوونه‌وه‌ی هه‌وكردنی ناو جه‌سته‌
له‌گه‌ڵ خواردنی شه‌كر و ئارد، ئاستی هه‌وكردنی ناو جه‌سته‌ زیاد ده‌بێت، ئه‌مه‌ش به‌هۆی ئه‌وه‌وه‌ ڕووده‌دات كه‌ به‌رزبوونه‌وه‌ی ئاستی شه‌كری جه‌سته،‌ یارمه‌تییه‌كی زۆر باشه‌ بۆ گه‌شه‌كردنی به‌كتریا زیانبه‌خشه‌كانی ناو ڕێخۆڵه‌.
به‌ڵام كاتێك شه‌كری ناو خوێن هاوسه‌نگی خۆی وه‌رده‌گرێته‌وه‌ به‌هۆی دووركه‌وتنه‌وه‌ له‌ شه‌كر و ئارد، ئاسته‌كانی هه‌وكردن و ژه‌هراویبوون له‌ جه‌سته‌دا كه‌م ده‌بنه‌وه‌‌.

4- زیادبوونی وزه‌ و ته‌ركیز
ئه‌و وزه‌یه‌ی كه‌ له‌ ئه‌نجامی خواردنی شه‌كر وئارد ده‌ستده‌كه‌وێت كورتخایه‌نن، چونكه‌ به‌زووی ده‌بێته‌ هۆی دابه‌زینی گلۆكۆز، ئه‌مه‌ش سه‌رئه‌نجام ده‌بێته‌ هۆی ته‌مبه‌ڵی و كه‌مبوونه‌وه‌ی ته‌ركیز.
به‌ڵام ئه‌گه‌ر تۆ ئه‌و 24 كاتژمێره‌ له‌ ئارد و شه‌كر دووربكه‌ویته‌وه‌، ئه‌وا چالاكی و ته‌ركیزت به‌ ته‌واوه‌تی زیاد ده‌كات، به‌تایبه‌ت ئه‌گه‌ر له‌بری ئه‌وانه‌، ڕۆنی ته‌ندروست و پڕۆتینی پێویست به‌كاربهێنیت.

5- ئه‌و 24 كاتژمێره‌ بێ شه‌كر و ئارد‌، یارمه‌تیده‌ره‌ بۆ پرۆسه‌ی میتاپۆلیزم، ئه‌مه‌ش هانده‌رێكی سه‌ره‌كی جه‌سته‌یه‌ بۆ سوتاندنی چه‌وری كه‌ڵه‌كه‌بوو به‌شێوه‌یه‌كی باشتر.