سوپای پاسدارانی ئێران دەستبەسەرداگرتنی کەشتییە نەوتهەڵگرەکان لەکەنداو پشتڕاستدەکاتەوە

سوپای پاسدارانی ئێران ڕایگەیاند، کە دەستیان بەسەر کەشتییەکی نەوتهەڵگردا لەئاوەکانی کەنداودا گرتووە، دوای ئەوەی کەشتییەکە ڕۆژی هەینی لەناکاو ڕێڕەوی خۆی لەگەرووی هورمز گۆڕیوه‌و بەرەو ئاوەکانی کۆماری ئیسلامی ڕۆیشتووه‌.

لەبەیاننامەیەکدا کە لەلایەن سوپای پاسەوانانی هێزی ده‌ریایی ئێران بڵاوکراوەتەوە، هاتووە، یەکەکانی دەستێوەردانی خێرای هێزە دەریاییەکانی سوپای پاسداران، بەکارکردن بەفەرمانی دادوەری بۆ دەستبەسەرداگرتنی باری کەشتییە نەوتهەڵگرەکەی تالارا کە ئاڵای دوورگەکانی مارشالیان لەسەرە، چاودێری جوڵەی کەشتییەکەیان کردووە، ڕێگرییان لێکردووە.

 ئاماژە بەوەشكراوه‌، کە کەشتییەکە پێشێلکارییەکی یاسایی كردووه‌ بەگواستنەوەی بارێکی زۆری بێ مۆڵەت.

لەڕاگەیەندراوەکەدا ئه‌وه‌ش هاتووه‌، کەشتییەکە 30 هەزار تۆن بەرهەمی پترۆکیمیایی هەڵگرتووەو ویستوویه‌تی بەرەو سەنگافورە بڕوات.

ئاژانسی هەواڵی "ئیرنا" ی زمانحاڵی حكوومه‌تی تاران ڕایگه‌یاندووه‌، دەستبەسەرداگرتنی کەشتییەکە لەده‌ره‌وه‌ی کردەوەی پێکدادان‌و تووندوتیژی لەگەڵ سه‌رنشینانی سه‌ر كه‌شتییه‌كه‌ بووه‌.

ئاژانسەکە ئاشكراشیكردووه‌، "ئەو بارەی دەستی بەسەرداگیراوە نزیکەی 30 هەزار تۆن بەرهەمی پترۆکیمیایی سەر بەئێران لەخۆدەگرێت کە بەشێوەیەکی نایاسایی بۆ سەنگافورە دەگوازرانەوە".

بەگوێرەی ئاسایشی دەریایی ئێران، کەشتییەکە لەعەجمان لەئیماراتی یەکگرتووی عەرەبییەوە بەرەو سەنگافورە ڕۆیشتووە".