له‌ئێران ئاگرێكى گه‌وره‌ كه‌وته‌وه‌و حكومه‌تى ئه‌و وڵاته‌ش داواى هاوكارى به‌په‌له‌ ده‌كات

ئەمڕۆ شەممە، میدیا ناوخۆییەکانی ئێران بڵاویانکردەوە، ئێران داوای هاوکاریی دەرەکی کردووە بۆ کوژاندنەوەی ئاگرێکی گەورە کە ماوەی چەند ڕۆژێکە دارستانەکانی باکوری ئەو وڵاتەی گرتووه‌ته‌وه‌و له‌كۆنتڕۆڵی خۆی ده‌رچووه‌.

دارستانەکانی هیرکانیا نزیکەی هەزار کیلۆمەتر بەدرێژایی کەناراوەکانی ئێران لەدەریای خەزەرو بەرەو ئازەربایجانی دراوسێ درێژ دەبنەوە.

یونسکۆ لەساڵی 2019دا دارستانەکانی وەک میراتی جیهانی ناساند كه‌ ته‌مه‌نی لەنێوان 25 بۆ 50 ملیۆن ساڵدایه‌و هه‌زاران ئاژه‌ڵی كێوی‌و زینده‌وه‌ری تێدایه‌، شوێنی زیاتر لە 3200 جۆری ڕووەکه‌ له‌ئاستی جیهانیدا.

لای خۆیه‌وه‌، ئاژانسی هەواڵی "ئیرنا"ی فەرمی ئێران بڵاویکردووه‌ته‌وه‌، ئاگرێک کە سەرەتای مانگی نۆڤەمبەر لەو ناوچەیە کەوتەوەو لەسەرەتادا کوژێنراوه‌ته‌وه‌و كۆنتڕۆڵكراوه،‌ به‌ڵام  لە 15ی ئەم مانگەدا سەرلەنوێ هەڵگیرساوه‌ته‌وه‌.

هاوكات، محەممەد جەعفەر غەمپەنا جێگری سەرۆک کۆماری ئێران رایگه‌یاندووه‌، هه‌موو هه‌وڵه‌كانی تیمه‌كانی فریاگوزاری له‌ئاستی هه‌موو ئێران خراونه‌ته‌گه‌ڕ بۆ رێگرتن له‌ته‌شه‌نه‌سه‌ندنی زیاتری ئاگره‌كه‌.

شینا ئەنساری سەرۆکی ڕێکخراوی پاراستنی ژینگەی ئێران ئه‌مرۆ شەممە وتی: دوو فڕۆکەی تایبەتمەند بۆمبڕێژکەری ئاوی‌و هێلیکۆپتەرێک‌و هەشت کەس لەتورکیاوە ڕەوانەی ناوچه‌كه‌ كراون.

تەلەفزیۆنی فه‌رمی ئێران ئاماژەی بەوەشکردووە، ئەگەر پێویست بکات داوای هاوکاری لەڕووسیاش دەکەین.

بەگوێرەی ڕاپۆرتی هەواڵدەریی تەسنیم، گوایە ئاگرەکە لەناوچەی بەردینی ئێلیت سەر بەپارێزگای مازەندەران لەباکووری ئێران لەلایەن ڕاوچییەکانەوە دەستی پێکردووه‌.