خانەنشینانی سەربازی دژی خەرجنەکردنی دەرماڵەکانیان گردبونەوە

نزیکەى دوو ساڵە لە سنورى پارێزگاى سلێمانى دەرماڵەى خانەنشینى بۆ خانەنشینان خەرجنەکراوە، جیاوازى لە نێوان خانەنشینانى هەولێر و سلێمانى کراوە، بەوهۆیەوە خانەنشینی سەربازی لە بەردەم بینای بەڕێوبەرایەتی خانەنشینی سلێمانی گردبوونەوەیەکى ناڕەزاتییان ئەنجامدا.

نوێنەرى خانەنشینانى سەربازى سلێمانى لە کۆنگرەیەکى رۆژنامەوانیدا رایگەیاند، خانەنشینان ماوەی 18 مانگە دەرماڵەی خانەنشینیەکانیان وەرنەگرتووە، جگە لە مووچەی کەڵەکەبووی مۆڵەتی ساڵانەی بەکارنەهێنراو، لە نێوان هەولێر و سلێمانی جیاوازییەکی زۆر لە مووچەی خانەنشینان هەیە، چونکە ئەو دەرماڵەیە لە هەولێر بۆ خانەنشینان خەرجدەکرێت.

وتیشى، خانەنشینان دەرماڵەی هاوسەرگیری و بڕوانامەی خوێندنیان وەرنەگرتووە، ئەمە جگە لەو یارمەتییانەی پەیوەستن بە پلەبەرزکردنەوەی کارەوە کە ژمارەیەکی زۆریان پێش خانەنشینبوون و دوای خانەنشینبوون وەریانگرتووە.

ئەو خانەنشینانە دوایانکرد، حکومەت و لایەنە پەیوەندیدارەکان خەرجکردنی دەرماڵەکانیان خێراتر بکات، لە ئەگەرى وەڵامنەدانەوەشیان وەڵامى توندیان دەبێت.