حەماس : بەبێ‌ وەستانی جەنگ لەسەر غەززە، ئاڵوگۆڕی دیلەكان ناكرێت

ناوەندی هەواڵ

گەورە بەرپرسێكی بزووتنەوەی حەماس دەڵێت، بەبێ‌ وەستانی جەنگ لەسەر كەرتی غەززە مەحاڵە ئاڵوگۆڕی دیلەكان بكرێت.

(خەلیل حەییە) هەڵسوڕێنەری كاروباری مەكتەبی سیاسی بزووتنەوەی حەماس لە كەرتی غەززە ڕایگەیاندووە، تاكو ئیسرائیل كوشتارو جەنگ لەسەر كەرتی غەززە رانەگرێت مەحاڵە باسی ئاڵوگۆڕی دیلەكان بكرێت.

حەییە لەدیدارێكی كەناڵی تەلەفزیۆنی ئەقسا ڕایگەیاند، ئەوە هاوكێشەیەكی وابەستەیە، هەر كاتێك هێرش بۆ سەر كەرتی غەززە وەستا، ئەوكات باسی ئاڵوگۆڕی دیلەكان دەكرێت لەگەڵ حەماس.

ناوبراو دەشڵێت، هەموو جارێك لەبەر هۆكاری سیاسی نەتنیاهۆ سەرۆك وەزیری ئیسرائیلی داگیركەر كۆسپ و لەمپەر لەبەردەم دانووستانەكان زیاد دەكات و بەو جۆرەش دانووستانەكان شكست دەهێنن و دەوەستن.

هەڵسوڕێنەری كاروباری حەماس لە كەرتی غەززە وتیشی، ئەوان ئامادەن بۆ وەستانی جەنگ، بەڵام دووژمنی داگیركەر هیچ ئیرادەیەكی ڕاستەقینەی نییە.

ئەو وتانەی بەرپرسەکەی حەماس لەکاتێکدایە چەند ڕۆژێک لەمەوبەر، ئەوكاتەی سەردانی بەرەكانی جەنگی كردبوو لە كەرتی غەززە، نەتنیاهۆ ڕەتیكردبوویەوە جەنگ بوەستێنێت.