بەشێک لە هاوڵاتیان وەرگرتنى نەوتەکەى حکومەتیان رەتکردەوە

ناوەندی هەواڵ

 بەڕێوەبەرایەتى نەوت و کانزاکانى سلێمانى رایگەیاند، دابەشکردنى نەوت بەردەوامى دەبێت بۆ سبەینێش لەچەند شوێنێک بڕى 200 لیتر بە نرخى 104 هەزار دینار بە هاوڵانیان دەدرێت، بە پێى زانیارییەکانیش بەشێک لەهاوڵاتییان ئامادە نیین بەو نرخە نەوتەکە وەربگرن.

ئەمڕۆ چوارشەممە 189-2024، دابەشکردنی نەوت لەسنوری قائمقامیەتی قەزای پشدەر دەستى پێکرد، بۆ هەرخێزانێک بری 200 لیتر دابینکرا بە نرخی 104 هەزار دینار، بەڵام بەپێى زانیارییەکان بەشێک لە هاوڵاتیان ئامادە نەبوون بەو نرخە نەوتەکە وەربگرن.

هەر ئەمڕۆ بەرێوەبەرایەتى نەوت و کانزاکانى سلێمانى لە راگەیەندراوێکدا بڵاویکردەوە، دابەشکردنى نەوت بۆ سبەینێ پێنجشەممە لە سنوری قەزای پشدەر بەردەوام دەبێت.

لە راگەیەندراوەکەدا هاتووەن بەهەمان شێوە لە سنوری پارێزگای هەڵەبجە لە ناوچەی هەورامان دەست بەدابەش کردنى نەوت دەکرێت.

ساڵانە لەگەڵ نزیکبوونەوەى وەرزى سەرما و سۆڵە دەست بەدابەشکردنى بڕە نەوتێک بەسەر هاوڵاتیاندا دەکرێت، بەڵام سەنتەرى شارەکانى لێبەدەر دەکرێت.