دوو ترلیۆن و 500 ملیار دینار لە وەزارەتێک دیار نەما

ناوەندی هەواڵ

دوو ترلیۆن و 500 ملیار لە وەزارەتی کاری عێراق دیارنەماوە و وەزیرەکەشی دەڵێت: پارەکە لەنێوان وەزارەتەکەی ئەوان و داراییدا بووە و سکاڵایان تۆمارکردوە.

ئەحمەد ئەسەدی وەزیری کار و کاروباری کۆمەڵایەتی عێراق لەبارەی دۆسییەیەکی هەستیار قسەیکردووە و ڕایگەیاندووە، تەواوی پارەی سندوقی چاودێریی کۆمەڵایەتی کە بڕەکەی دوو ترلیۆن و 500 ملیار دیناربووە و لە وەبەرهێنان و پشکی سندوقەکە لە قازانجی کۆمپانیاکانەوە کۆکراوەتەوە دیار نەماوە.

ئاماژەی بەوەشداوە،  وەزارەت پلانی وابووە، لەبری پشتبەستن بە حکومەت و خەزێنەی دەوڵەت، لەڕێگەی ئەو پارەیە و قازانجی وەزارەت موچەی چاودێریی کۆمەڵایەتی دابینبکات.

بەووتەی ئەحمەد ئەسەدی وەزیری کار و کاروباری کۆمەڵایەتی عێراق،  دوو مانگێک پێش ئێستا کاتێک چوون سەیری سندوقەکە بکەن تووشی سەرسوڕمانبوون کە زانیویانە هەموو پارەکە بێئاگاداریی ئەوان ڕاکێشراوە.

ئاماژەی بەوەشکردووە،  مامەڵەکردن بە پارەکەوە لەنێوان وەزارەتی کار و داراییدا بووە و پێدەجیت پارەکە بۆ سەنەدات ڕاکێشرابێت و وەزارەتەکەشیان سکاڵای تۆمارکردوە.