تەندروستی جیهان پلانێک بۆ وەستاندنی بڵاوبوونەوەی ئاوەڵەی مەیموون دەستپێدەکات

ناوەندی هەواڵ

ڕێکخراوی تەندروستی جیهانی دەستپێکردنی پلانێکی 6 مانگی ڕاگەیاندووە بۆ ڕاگرتنی بڵاوبوونەوەی نەخۆشی ئاوەڵەی مەیموون، ئەوەش بە زیادکردنی ژمارەی کارمەندان لە وڵاتانی تووشبوو و بەهێزکردنی ڕێگاکانی چاودێری و خۆپاراستن.

ئەمڕۆ دووشەممە، 26-8-2024، ڕێکخراوی تەندروستی جیهانی ڕایگەیاندووە، پێشبینی دەکەن پلانەکە کە لە مانگی ئەیلولەوە تا مانگی شوباتی ساڵی داهاتوو بەردەوام دەبێت، بۆیە پێویستیان بە 135 ملیۆن دۆلار دەبێت، بۆ باشترکردنی دەستڕاگەیشتن بە ڤاکسین بە شێوەیەکی دادپەروەرانە، بەتایبەتی بۆ وڵاتانی ئەفریقا کە زۆرترین زیانیان بەرکەوتووە بەهۆی بڵاوبوونەوەی ڤایرۆسەکەوە.

تیدرۆس ئادهانۆم، بەڕێوەبەری گشتی ڕێکخراوی تەندروستی جیهانی لە بەیاننامەیەکدا ڕایگەیاندووە، دەتوانرێت بڵاوبوونەوەی ڤایرۆسەکە لە کۆنگۆ و وڵاتانی دراوسێی کۆنترۆڵ بکرێت و ڕابگیرێت.

ئاماژەی بەوەشکردووە، ڕێکخراوەکە ژمارەی کارمەندەکانی لە وڵاتانی زیانلێکەوتوودا زیادکردووە.

لە ناوەڕاستی مانگی ئابدا، ڕێکخراوی تەندروستی جیهانی بڵاوبوونەوەی نەخۆشی ئاوەڵەی مەیموونی وەک حاڵەتێکی نائاسایی تەندروستی جیهانی پۆلێن کرد.

سەنتەری ئەفریقا بۆ کۆنتڕۆڵکردنی نەخۆشییەکان لە دوایین بەیاننامەی خۆیدا سەبارەت بە بڵاوبوونەوەی ڤایرۆسەکە ڕایگەیاندووە، تا ڕۆژی پێنجشەممە، زیاتر لە 21 هەزار و 300 حاڵەتی گومانلێکراو یان پشتڕاستکردووەتەوە کە تووشبوون و 590 حاڵەتی گیانلەدەستدانیش لەمساڵدا لە 12 وڵاتی ئەفریقا تۆمارکراون.