توركیا بۆ ئه‌مریكا: له‌گه‌ڵ هه‌سه‌ده‌ ئاگربه‌ستمان نه‌كردووه‌

ناوەندی هەواڵ

 سەرچاوەیەک لە وەزارەتی بەرگریی تورکیا وەڵامی وتەبێژی وەزارەتی دەرەوەی ئەمریکاى دایەوە و رایگەیاند: "وەک تورکیا ئەوان لەگەڵ هیچ رێکخراوێکی 'تیرۆریستی' دانانیشن. هەست دەکەین ئەو لێدوانەی لەمبارەیەوە دراوە، قسە لە دەم دەرچوون بووە".

ئەم وتانەی سەرچاوەکەی وەزارەتی بەرگریی تورکیا دوای ئەوە هات ماتیۆ میللەر وته‌بێژى وه‌زاره‌تى ده‌ره‌وه‌ى ئه‌مریكا رایگەیاند: تورکیا و هەسەدە گەیشتوونەتە رێککەوتن لەبارەی راگەیاندنی ئاگربەست لە مەنبج.

سەرچاوە تورکییەکە جەختی لەوە کردووەتەوە کاری لەپێشینەی ئەوان لە سوریا لەناوبردنی هەسەدەیە کە تورکیا بە یەپەگە ناوی دەبات و بە باڵی سوریای پەکەکەی دەزانێت و دەڵێت: "ئەم رێکخراوە بووەتە هەڕەشە لە سەر ئاسایشی تورکیا و سوریایش".

باسیشی لەوە کردووە "تا شەڕڤانانی هەسەدە چەک دادەنێن و شەڕڤانە بیانییەکانی ناو ڕێکخراوەکە سوریا جێ نەهێڵن، ئەوان بەردەوام دەبن لە گرتنەبەری رێوشوێنی پێویست و ئامادەکاری دەکەن بۆ بەرەنگاربوونەوەیان". 

ئەو لێدوانانە لە کاتێکدا دێن چەند رۆژێکە سوپای تورکیا و گروپە جیهادییەکانی سەر بە تورکیا هێزێکی زۆریان لە دیوی باکوری کوردستانەوە لەسەر سنوری رۆژئاوای کوردستان کۆ کردووەتەوە و میدیا جیهانییەکان ئاماژە بەوە دەدەن هێرشی تورکیا بۆ سەر رۆژئاوا کوردستان لە ئانوساتدایە و کۆبانێیان وەک ئامانجی یەکەمی هێرشەکە دیاری کردووە.