دادگای فیدراڵی بڕیار لەبارەی دوو وەزارەتی هەرێم دەدات

ناوەندی هەواڵ

دادگای فیدراڵی عێراق كۆدەبێتەوە و بڕیار لەبارەی دوو وەزارەتی هەرێمی كوردستانەوە دەدات.
بەگوێرەی خشتەی بینینی دۆسیەكانی دادگای فیدراڵی عێراق ئەمڕۆ دووشەممە 23ـی كانوونی یەكەمی 2024، ، دادگاكە گفتوگۆ لەبارەی دوو دۆسیە دەكات كە پێشتر  داواكار خالید مستەفا، دوو سكاڵای لەسەر سەرۆكی پەرلەمانی كوردستان تۆماركردووە، كە وەزارەتی كاروباری شەهیدان و ئەنفالكراوان لە هەرێمی كوردستان بە گوێرەی یاسای ژمارە 8ـی ساڵی 2006 نادەستوورییە.
سكاڵاكارەكە داوایكردووە بە پابەندكردنی پەرلەمان و حكومەتی هەرێمی كوردستان بە پێكهێنانی دەستەیەك بەناوی دامەزراوەی شەهیدان كە پەیوەستە بە ئەنجوومەنی وەزیرانەوە، بۆ ئەوەی لە رووی دارایی و كارگێڕییەوە ئۆرگانێكی سەربەخۆ بێت و كارەكانی ئەو دەستەیە رێكبخرێت.
سكاڵاكارەكە داواشیكردووە، وەزارەتی ئەوقاف و كاروباری ئایینی لە هەرێمی كوردستان نادەستوورییە، ئەوەش بەگوێرەی یاسای ژمارە 11ـی ساڵی 2007، یاسای وەزارەتی ئەوقاف و كاروباری ئایینی.
هاوكات داوایكردووە بە پابەندكردنی پەرلەمان و حكومەتی هەرێمی كوردستان بە پێكهێنانی فەرمانگەی ئایینی بۆ ئەو مەزهەب و ئایینە جیاوازانەی لە هەرێمی كوردستاندا هەن، كە پەیوەستن بە ئەنجوومەنی وەزیرانەوە و لە رووی دارایی و كارگێڕییەوە ئۆرگانێكی سەربەخۆن.
دادگای فیدراڵی عێراق، بێجگە لەو دوو دۆسیەیە تاوتوێی شەش دۆسیەی دیكەش دەكات و بڕیاری پێویستیان لەبارەوە دەدات.