ئه‌مریكا داوای دورخستنه‌وه‌ى حوسییه‌كان لە بەغدا ده‌كات

واشنتۆن داوای لە بەغداد كردووە حوسیەكان لە عێراق دوربخاتەوە،به‌هۆى ئه‌وه‌ى پێیوایه‌ بوونی حوسیەكان عێراق دەكات بە بەشێك لە كێشەكانی ناوچەكه‌.

 ئەمڕۆ بەرپرسێكى  وەزارەتی دەرەوەی عێراق بە رۆژنامەی "العربی الجدید"وتووە: لەماوەكانی رابردودا، ئەمریكا داوای لە بەغداد كردووە چالاكی حوسییەكان لەسەر خاكەكەی رابگرێت، بە نوسینگەكەشیانەوە لە بەغدادی پایتەخت.

ده‌شڵێت، هەڵوێستی نوێی ئەمریكایان پێگەیشتوە بە راگرتنی چالاكی حوسیەكان لەسەر خاكی عێراق و ده‌شڵێت، حكومەت بە جدی مامەڵە لەسەر ئەو جۆرە داوایانە دەكات، بۆ بەدورگرتنی گەلی عێراق و رەنگدانەوەی ئەو دۆخەی وڵاتانی ناوچەكەی تیادا دەژی.

پێشتریش پێگەی "یەمەن مۆنیتۆر" دوو رۆژ لەمەوبەر لەزاری دوو سەرچاوەی دیپلۆماسیەوە بڵاویكردەوە: حكومەتی عێراق داواكەی ئەمریكای بە حوسیەكان و ئێرانیەكان گەیاندووە، بۆ دورخستنەوەی سەركردە سەربازییەكانی حوسیەكان، كە لەگەڵ میلیشیای حزبوڵای عێراقی كاردەكەن.

ساڵانێكە گروپی حوسی، نوسینگەیەكیان لە ناوچەی جادرییەی بەغداد كردووەتەوە، بەنوێنەرایەتی باڵای ئەو گروپە ناسراوەو ئەبو ئیدریس ئەلشەرەفی و هەندێك لە سەركردەكانی تری حوسی كە لە عێراق نیشتەجێن، سەرپەرشتی دەكەن، كە دیارترینیان "ئەبو عەلی عزی و محەمەد عەبدولعەزیم حوسی"یە.