عێراق بەوردی چاودێری بریارەكانی ترەمپ دەكات

عێراقییەكان بەوردی چاودێری بڕیارەكانی دۆناڵد ترەمپ سەرۆكی ئەمریكا دەكەن، ئەحمەد تەمیمی پسپۆڕی كاروباری ئابوری جەخت دەكاتەوە بریارەكانی ترەمپ بەشێوەیەكی مەترسیدار كاریگەری لەسەر ئابوری عێراق دەبێت.

بەوتەی ئەو پسپۆڕە عێراقییە بۆ "بەغداد یەوم" بریارەكانی دۆناڵد ترەمپ سەرۆكی ئەمریكا سەبارەت بە دابەزاندنی بەهای نەوت لەئایندەدا كاریگەری خراپی لەسەر داهاتووی ئابوری عێراق دەبێت، لەكاتێكدا عێراق بەشێوەیەكی گشتیی پشت بە داهاتی نەوت دەبەستێت.

بەوتەی ئەو پسپۆڕە عێراقییە، لەدۆخی دابەزینی بەهای نەوتدا عێراق ڕوبەڕووی قەیرانێكی قورس دەبێتەوە بۆ پارەداركردنی بوددجەكەی، بەوەش كورتهێنان لە بودجەدا زیاتر دەبێت و پرۆژەكانی وەبەرهێنان ڕادەگیرێن و تەنها دەتوانرێت مووچە دابین بكرێت.

پێشتر پێگەی "ئۆیڵ پرایس" كە تایبەتە بە داتاكانی نەوت و وزە لە جیهان، باسی لەوەكردبوو، تیمی ترەمپ بیر لەوەدەكاتەوە سزای ڕاستەوخۆ بەسەر عێراقدا بسەپێنێت، ئەویش وەك وەڵامێك بۆ هاوكاریكردنی ئێران لە بە قاچاغبردنی نەوتەكەیدا لەرێگەی بەندەرەكانیەوە، هۆكارێكی دیكەش بوونی چەند هێزێكە كە كار بۆ سپیكردنەوەی پارە و پشتیوانی چالاكییە جۆراوجۆرەكان دەكەن.

ئەو پێگەیە ئاماژەی بەوەداوە، ئیدارەی نوێی ئەمریكا كار بۆ ئەوەدەكات سزا بەسەر چەند وڵاتێكدا بسەپێنێت كە ئەوان بە دەوڵەتە "گەمژە بەسودەكان" ناویان دەبەن ئێستاش عێراق كار بۆ ئەوە دەكات خۆی لەو سزایانە بەدوور بگرێت.

هۆكارێكی ئەگەری سەپاندنی ئەو سزایە لەلایەن ئەمریكاوە بەسەر عێراقدا، دەگەرێتەوە بۆ ڕێككەوتنی عێراق لەگەڵ ئێران بۆ ماوەی دووساڵ تا غازی ئەو وڵاتە بۆ كارەبا هەناردەی عێراق بكات.

ئەگەر ئەمریكا ئەو سزایانە جێبەجێ بكات كە پشتیوانەكانی ئێران دەگرێتەوە، ئەوا 20 كیان و هێز بەر سزاكان دەكەن كە بارەگاكانیان لە عێراق و ئێرانە، تۆمەتەكەشیان ئەوەدەبێت كە بوونەتە ئامرازێك بۆ ناردنی پارە بۆ سوپای پاسدارانی ئێران.