سەرۆکایەتیی سوریا: فیدڕاڵی و خۆسەری لە رۆژئاوا ڕەتدەكەینەوە

ناوەندی هەواڵ

سەرۆکایەتی کۆماری سووریا وەڵامی کۆنفڕانسی “یەكڕیزی و یەكهەڵوێستی” دوێنێی کوردانی ڕۆژئاوای دایەوە و دەڵێت: هەموو كیانێك لەژێر ناوی فیدڕاڵی و خۆسەری ڕەتدەكەینەوە.

رۆژێك لەدوای بەستنی كۆنفرانسی "یەكڕیزیی و یەكهەڵوێستی كورد" لە رۆژئاوای كوردستان لە شاری قامیشلۆی رۆژئاوای كوردستان، سەرۆكایەتی كۆماری سوریا بەیاننامەیەكی بڵاوكردوەتەوەو "فیدراڵیەت" بۆ كورد رەتدەكاتەوەو وەكو هەوڵی جوداخوازانە ناوی دەهێنێت و دەڵێت:" هەر جۆرە هەوڵێك بۆ سەپاندنی واقعی دابەشكاریی یاخود دامەزراندنی قەوارەی جوداخوازانە لەژێر ناوەكانی فیدراڵیەت یان خۆبەڕێوەبەرێتی بەبێ سازانێكی گشتگیری نیشتمانی رەتدەكەینەوە".

سەرۆكایەتی كۆماری سوریا لە بەیاننامەیەكدا ئاماژەی بەوەكردووە، لێدوانەکانی دوێنێ هەسەدە پێچەوانەی ڕێکكەوتنەکەی نێوان مەزڵوم عەبدی و شەرع  بووە و دژی هەر هەوڵێکن بۆ فیدڕاڵی و خۆبەرێوەبەری.

لە بەیاننامەکەدا داوایان کردوە لە هەسەدە و لایەنە هاوبەشەکانی دیکەیان، کە "پابەندی رێککەوتنی نێوانمان بن و بە هیچ شێوەیەک دابەشکردنی سوریا قبوڵکراو نییە".

شەرۆکایەتی سوریا دەشڵێت، یەکگرتوویی گەل و خاکی سوریا هێڵی سوورە و گۆڕانکاری دیمۆگرافی ڕەت دەکەینەوەو هەموو هەوڵێک بۆ دابەشکردن یان بنیادنانی قەوارەی جیاکراوە لەژێر ناوی فیدڕاڵیەت و ئیدارەی خۆسەر بەبێ ڕێککەوتنی نیشتمانیی گشتگیر ڕەتدەکەینەوە.

دەشڵێت: ناکرێت هەسەدە دەسەڵاتی بڕیاردان لە باشوور و رۆژهەڵاتی سووریا قۆرخ بکات.

سەرۆکایەتی سوریا ئاماژەی بەوەکردووە، مافی کورد لەسەر بنەمای هاوڵاتیبوون و یەکسانی لە سووریایەکی یەکگرتوودا پارێزراوە.