تۆماس باراك بۆ مه‌زڵوم عه‌بدی، به‌رده‌وامبن له‌ دانوستان له‌گه‌ڵ توركیادا

ناوەندی هەواڵ

تۆماس باراك، نێرده‌ی تایبه‌تی ویلایه‌ته‌ یه‌كگرتووه‌كانی ئه‌مریكا بۆ كاروباری سوریا، له‌ دیمه‌شقه‌وه‌ په‌یوه‌ندییه‌كی ته‌له‌فوونی له‌گه‌ڵ مه‌زڵوم عه‌بدی سه‌رۆكی هێزه‌كانی سوریایی دیموكرات ئه‌نجام دا.

تۆماس باراك له‌ په‌یوه‌ندییه‌ ته‌له‌فوونییه‌كه‌یدا جه‌ختی له‌ نه‌گۆڕانی سیاسه‌تی ئه‌مریكا كردۆته‌وه‌ به‌رامبه‌ر (هه‌سه‌ده‌) و به‌رده‌وامی هاوكاریكردنی ئه‌مریكا له‌ شه‌ڕی دژ به‌ داعشدا.

تۆماس باراك هانی جه‌نڕاڵ مه‌زڵووم عه‌بدی داوه‌ كه‌ دانوستانه‌كانیان له‌گه‌ڵ توركیا به‌رده‌وامی پێبده‌ن، له‌پێناو كه‌مكردنه‌وه‌ی گرژییه‌كانی نێوان ئه‌وان و توركیا.

به‌ پێی چه‌ند سه‌رچاوه‌یه‌كی ئاگادار‌ كه‌ قسه‌یان بۆ ئه‌لمۆنیتۆری ئه‌مریكی كردووه‌، بڕیار وایه‌ دانوستانی دیكه‌ له‌نێوان به‌رپرسانی باڵای توركیا و هێزه‌كانی سوریای دیموكرات و به‌ڕێوه‌به‌ری خۆسه‌ری دیموكرات به‌ڕێوه‌بچێت، له‌نێویاندا دانیشتنی نێوان به‌رپرسانی توركیا له‌گه‌ڵ مه‌زڵووم عه‌بدی، به‌ڵام ئه‌و یه‌كدیتنانه‌ وه‌ستاوه‌ته‌ سه‌ر ئه‌نجامی ئه‌و كۆبوونه‌وه‌یه‌ی كه‌ بڕیار وایه‌ به‌مزوانه‌ له‌نێوان شاندێكی كوردانی ڕۆژئاڤا له‌گه‌ڵ به‌رپرسانی حكومه‌تی ڕاگوزه‌ری سوریا له‌ دیمه‌شق به‌ڕێوه‌بچێت.