توركیا: ڕاگەیەنراوەكەی بارەگای بارزانی جێگای قبوڵ نییە

ناوەندی هەواڵ

بارەگای بارزانی تورکیای توڕەکردوە و وەزارەتی دەرەوەی وڵاتەکە داوای ڕوونکردنەوە لە بەرپرسانی ئەو حزبە دەکات بەرامبەر ئەو قسانەی بە دەوڵەت باخچەلی کراوە و دەڵێن قبوڵی ناکەین.

وەزارەتی دەرەوەی تورکیا بەیاننامەیەكی توندی لەكاردانەوەی ڕاگەیەنراوەكەی بارەگای بارزانی دەركرد دەڵێت: ئەو ڕاگەیەنراوەی لەلایەن نوسینگەی بارزانیەوە، دەوڵەت باخچەلی، سەرۆکی پارتی بزوتنەوەی ناسیۆنالیستی مەهەپەی كردووەتە ئامانج، هەم لە ناوەڕۆک و هەم لە زمانەکەیدا جێگای قبوڵ نییە.

توركیا داوا لە سەرکردایەتی پارتی دەکات، لەبارەی ئەو ڕاگەیەنراوە كە بە ئیستفزاز و بوونی "تۆمەتی بێ بنەما" تێیدا ناوی بردوە، رونکردنەوەی بدات رێوشوێن بگرێتەبەر.

وەزارەتەکە داوای لە بەرپرسانی پارتی کردوە ڕوونکردوە دەستبەجێ ڕوونکردنەوەی خۆیان بدەن و ڕێکاریش لەوبارەیەوە بگرنەبەر.
 
ئەوەش دوای ئەوە دێت دەوڵەت باخچەلی ڕایگەیاند، چوونە تورکیای مەسعود بارزانی سەرۆکی پارتی بە یاوەری چەکدار لەناو تورکیادا لە شکۆ و سەرەوەریی تورکیای داوە، لەبەرامبەریشدا بارەگای بارزانی وەڵامی باخچەلی دایەوە و وتیان وامانزانیوە بیروبۆچوونی باخچەلی گۆڕاوە، بەڵام دیارە هێشتا گورگە بۆرەکەی جارانە لە پێستی مەڕدا.