سەرۆك وەزیرانی نوێى بەریتانیا لە یەكەم ڕۆژی كاركردنیدا یاسای ناردنی كۆچبەرانی بۆ ڕواندا ڕاگرت

ناوەندی هەواڵ

سەرۆك وەزیرانی نوێی بەڕیتانیا لە یەكەمین بڕیاری خۆیدا یاسای ناردنی كۆچبەرانی بۆ ڕواندا هەڵوەشاندەوە.

بەپێی هەواڵێکی  ڕۆژنامەی تەلەگرافی بەڕیتانی، کیەر ستامەر، لە یەكەم ڕۆژی كاركردنیدا وەك سەرۆك وەزیرانی نوێی بەڕیتانیا كاركردنی بە (یاسای ڕواندا) ڕاگرت كە تایبەتە بە ڕاگواستنی كۆچبەران لە بەڕیتانیاوە بۆ ڕواندا.

یاسای ڕواندا پێشتر لەلایەن كابینە حكومییەكانی پارتی پارێزگارانەوە پەسەند كرابوو و مانگی چواری ئەمساڵ لەلایەن پەڕلەمانی بەڕیتانیاوە دەنگی لەسەر درا.

دوێنێش ئیڤیت كۆپەر، وەزیری نوێی ناوخۆی بەڕیتانیا ئاشكرای كرد، فەرماندەییەكی نوێ بۆ كۆنترۆڵكردنی سنوورەكانی وڵاتەكەی پێكدەهێنێت و ڕاشیگەیاند، یەكێك لە ئەركە سەرەتاییەكانی حكومەت پاراستنی سنوورەكانە.

هەڵوەشاندنەوەی یاسای ڕواندا لە بەرژەوەندیی پەنابەرانی بەڕیتانیایە، هەرچەندە پارتی كرێكاران كە تازە دەسەڵاتی گرتووەتە دەست ئاماژەی بەوە داوە، ڕاگرتنەكە بەهۆی تێچووی زۆرەوەیە لەسەر حكومەت و بۆ چارەسەری كێشەی پەنابەران بەدوای ڕێگاچارەی دیكەدا دەگەڕێن.