سوپاى ئیسرائیل بە فەرمى کوژرانى حەسەن نەسروڵاى راگەیاند

ناوەندی هەواڵ

سوپای ئیسرائیل ڕایگەیاند، لە هێرشێکی ئاسمانیدا بۆ سەر باشووری لوبنان، حەسەن نەسروڵلا، ئەمینداریی گشتیی حزبوڵلای لوبنانیان  کوشتووە.

درەنگانێکى شەوى رابردوو راستەوخۆ دواى ئەنجامدانى هێرشى ئاسمانیی بەرفراوان لەلایەن ئیسرائیل و بۆسەر بارەگاى سەرەکیی حیزبوڵا لە لوبنان، میدیاکان باسیان لە چارەنوسى نادیارى حەسەن نەسروڵا دەکرد و میدیا ئیسرائیلییەکانیش هەر زو رایانگەیاند، نەسروڵا لە هێرشەکەدا کوژراوە.

ئەفیخاى ئەدرعى، وتەبێژى سوپاى ئیسرائیل بە زمانى عەرەبى لە تۆڕى کۆمەڵایەتیی ئێکس نوسیویەت، بە فەرمیی کوشتنى تیرۆرست حەسەن نەسروڵا رادەگەیەنین.

بە وتەى سوپاى ئیسرائیل کوشتنی نەسروڵا دەمێکە پلانی بۆ دانراوە و لەکاتی پێویستدا جێبەجێکرا و هۆشداریش دەدات، هەر کەسێک هەڕەشە لە ئاسایشمان بکات دەیکەینە ئامانج.

هاوکات میدیا ئیسرائیلییەکان جەختیان کردوەتەوە کە دەزگا ئەمنییەکانى ئیسرائیل بەڵگەیان لایە کە حەسەن نەسروڵا، ئەمیندارى گشتى حیزبوڵاى لوبنان لە ئۆپەراسیۆنێکدا شەوى هەینى کوژراوە.