ماکرۆن: لە پۆستەکەم دەمێنمەوە و پاشەکشە ناکەم

ناوەندی هەواڵ

سەرۆكی فەرەنسا هەڵوێستی خۆی لەبارەی دەستلەكاركێشانەوە لە پۆستەكەی ئاشكرا دەكات و دەڵێت: ئەنجامەکانی هەڵبژاردنە پێشوەختەكە هەرچییەك بێت لە پۆستەكەم دەمێنمەوە، و پاشەکشە ناکەم.

ئیمانوێل ماكرۆن، لە دیدارێكی لەگەڵ ڕۆژنامەی لۆفیگارۆی فەرەنسی هەڵوێستى خۆی لەسەر هەڵبژاردنەکە و ئەگەری مانەوە یان دەست لەکارکێشانەوەى خستووەتەڕوو.

ماکرۆن ڕایگەیاندوە: بڕیارمداوە هەڵبژاردنی پێشوەختەی پەرلەمانی فەرەنسا لە ڕۆژی ٣٠ـی ئەم مانگە بەڕێوەبچێت، ئەنجامەكەشی هەرچییەك بێت لە پۆستەكەم دەمێنمەوە و دەستلەكارناكشێمەوە.

ئاماژەى بەوەشکردوە، ئەگەر هاتوو ئەو حزبە سەركەوتنی لە هەڵبژاردنە پێشوەختەكەی پەرلەمانی فەرەنساش بەدەستبهێنێت، ئەو لە پۆستی سەرۆككۆمار دەمێنێتەوەو بەهیچ شێوەیەك دەستلەكار ناكێشێتەوە.

ماكرۆن جەختیکردەوە، ئەنجامی هەڵبژاردنی پەرلەمانی ئەوروپا هیچ کاریگەریەکى لەسەر هەڵبژاردنی پەرلەمانی فەرەنساوە نابێت و مەرج نییە  ئەنجامێکی ئەوتۆی هەبێت.
سەبارەت بە ڕاپرسییەکانیش کە لەبارەى شکستهێنانی ئەوەوە بڵاودەکرێنەوە، ماکرۆن وتی: بڕوام بە ئەنجامی ڕاپرسییەكان نییە كە لەبارەی ئەنجامی هەڵبژاردنەكانەوە بڵاودەكرێنەوە.

جێی ئاماژەیە پارتى گردبوونەوەى نیشتیمانى لە هەڵبژاردنى پەرلەمانى ئەوروپا توانیبووی سەرکەوتن بەدەست بهێنێت و لە ٣١%ی دەنگەکانی بۆ خۆی مسۆگەر کردبوو.