پزیشکیان: هیچ وڵاتێک ناتوانێت هێرشبکاتە سەر ئێران

ناوەندی هەواڵ

سەرۆک کۆمارى ئێران، ڕایگەیاند، تواناکانى بەرگریى و بەرپەرچدانەوەى وڵاتەکەى بەجۆرێک گەشەى کردووە، هیچ هێزو ئەهریمەنێک بیر لەوە ناکاتەوە هێرشبکاتە سەر وڵاتەکەیان.

مەسعود پزیشکیان، سەرۆک کۆمارى ئێران، لە ساڵیادى دەستپێکردنى هەفتەى بەرگریى پیرۆز کە یادى هەشت ساڵەى شەڕى نێوان ئێران و عێراقە، لە نزیک مەزارگەى ئیمام خومەینى لە شارى رەى باشوورى تاران بەڕێوەچوو ڕایگەیاند، تواناى بەرگریى و بەرپەرچدانەوەى وڵاتەکەى بەشێوەیەکى گەورە گەشەیکردووە، بەجۆرێک هیچ هێزێک ناتوانێت بیر لەوە بکاتەوە هێرشبکاتە سەر وڵاتەکەیان.

وتیشی، بە یەکێتی و یەکگرتوویی وڵاتانى ئیسلامى، ئاشتى و سەقامگیریی بۆ ناوچەکە دەستەبەردەکەن و پێکەوە ڕووبەڕووى ئیسرائیل دەبنەوە.

پزیشکیان گەلى ئێرانى دڵنیاکردەوە و دووپاتیکردەوە، دەتوانن بەرگریى لە وڵاتەکەیان بکەن و ئاسایش و ئارامى ناوچەکەیان بپارێزن.

نمایشى هەفتەى بەرگریى پیرۆز کە یادى هەشت ساڵەى شەڕى نێوان ئێران و عێراقە، تێیدا مووشەکى فاتیح کە خێراییەکەى دەگاتە سەروو خێرایی دەنگ و چەندین جۆرى دیکەى مووشەک نمایشکران.