یونسێف کوژرانى 14 هەزار منداڵى لەلایەن ئیسرائیلەوە راگەیاند

ناوەندی هەواڵ

جێگری بەڕێوەبەری جێبەجێکاری سندووقی منداڵانی نەتەوەیەکگرتوەکان – یونسێف رایگەیاند، دۆخى مرۆیی لەغەززە بەرەو خراپتر دەچێت و هاوکارییەکان کەمیان کردووە، تا ئێستا زیاتر لە 14 هەزار منداڵ لە غەززە لەلایەن ئیسرائیلەوە کوژراون.

لە 7ى مانگی تشرینی یەكەمی ساڵی ڕابردووەوە چەكدارانی حەماس لە ڕێگەی هەزاران مووشەكەوە هێرشیان كردە سەر ئیسرائیل، دواتر ئیسرائیل هێرشی پێچەوانەی بۆ كەرتی غەزە دەستپێكرد، لە ئەنجامدا بە هەزاران كەس بوونە قوربانیی و ئاوارە بوون، تا ئێستاش شەڕ و پێكدادانی نێوان چەكدارانی حەماس و سوپای ئیسرائیل بەردەوامە.

تێد چیبان جێگری بەڕێوەبەری جێبەجێکاری سندووقی منداڵانی نەتەوەیەکگرتووەکان رایگەیاند، دۆخی مرۆیی لە غەززە بەرەو خراپتر دەچێت، بەوپێیەی ژمارەی ئاوارەبووەکان بۆ ملیۆنێک ‌و ٩٠٠ هەزار کەس بەرزبووەتەوە.

دەشڵێت، تا ئێستا زیاتر لە 14 هەزار منداڵ لە غەززە لەلایەن ئیسرائیلەوە کوژراون و ژمارەی بارهەڵگرەکانی هاوکاریی لە مانگی ئابدا لە 100 بارهەڵگرەوە بۆ 15 بارهەڵگر لە ڕۆژێکدا بۆ مانگی ئەیلول کەمبووه‌تەوە.