ئێران هۆشداری دەدات لەسەر هەڵدانی کارەساتێکى گەورە لە ڕۆژهەڵاتى ناوەڕاست

ناوەندی هەواڵ

وەزیرى دەرەوەى ئێران لەبارەى دۆخى ڕۆژهەڵاتى ناوەڕاست، هۆشداریى دەدات و جەختیش لە پشتیوانیکردنى لوبنان دەکاتەوە، بەرپرسێکى ئیسرائیلیش دەڵێت،هەمو ڕێگایەک دەگرنەبەر بۆ گەڕانەوەى ئارامى بۆ باکورى وڵاتەکەیان.
 
عەباس عێراقچى، وەزیرى دەرەوەى ئێران لە وتارێکدا لە کۆبونەوەى کۆمەڵەى گشتى نەتەوە یەکگرتوەکان ڕایگەیاند، ناوچەکە لە لێوارى کارەساتێکى گەورەدایە و ئەگەر سنورێکى بۆ دانەنرێت ئەوا لێکەوتەکانى کاریگەریان لەسەر تەواوى جیهان دەبێت.

جەختیشیکردەوە، ئێران بەهەمو شێوازێک پشتیوانى لە گەلى لوبنان دەکات.

لە وەڵامی وەزیرى دەرەوەى ئێراندا، دانى دانون، باڵیۆزى ئیسرائیل لە نەتەوە یەکگرتوەکان ڕایگەیاند، وڵاتەکەى چارەسەى دیپلۆماسى بە ڕێگەیەکى باشتر دەزانێت بۆ چارەسەرى  کێشەکان و گەڕانەوەى  ئاوارەکانى باکورى ئیسرائیل بۆ ماڵەکانیان، بەڵام لە حاڵەتى شکستى ڕێگە چارە دیپلۆماسییەکان، هەمو ئامرازەکانى دیکە بەکاردەهێنن بۆ گەرانەوەى ئارامى بۆ باکورى ئیسرائیل.