مووچە ئامادەیە، بەڵام بە دوو مەرج دەنێردرێت

ناوەندی هەواڵ

ماڵپەڕی بەغداد ئەلیەوم لە زاری سەرچاوەیەکی ئاگادار لە وەزارەتی دارایی عێراقەوە بڵاویکردەوە، پارەی پێویست (نەختینە) بۆ مووچەی فەرمانبەرانی هەرێمی کوردستان ئامادەیە، بەڵام خەرجکردنی بەستراوەتەوە بە ڕەزامەندیی وەزیری دارایی و جێبەجێکردنی چەند مەرجێک لەلایەن حکومەتی هەرێمەوە .

بەپێی سەرچاوەکە، مەرجەکانی بەغدا بۆ ناردنی مووچە بریتین لە:

دەستپێکردنەوەی هەناردەی نەوت:حکومەتی هەرێم دەبێت لە ماوەی48 کاتژمێردا دەست بە هەناردەکردنەوەی نەوتی خۆی بکات (لەلایەن کۆمپانیای سۆمۆوە) .

قبوڵکردنی بڕیاری ئەنجومەنی دەوڵەت: حکومەتی هەرێم دەبێت پابەند بێت بەو چارەسەرە یاساییەی کە لەلایەن ئەنجومەنی دەوڵەتەوە سەبارەت بە دۆسیەی داهاتە ناوخۆییەکان دەردەچێت.
سەرچاوەکە جەختی کردووەتەوە کە مووچە ئامادەیە بۆ گواستنەوە، بەڵام چاوەڕێی ڕەزامەندیی وەزیری داراییە کە ئەویش بەستراوەتەوە بە پابەندبوونی هەرێم بەو مەرجانەوە .