لە پەرلەمان یاسای ئاشتی و لە فڕۆکەخانە کەلەپچە؛ تورکیا بە دەستگیرکردنی نۆئارین پرۆسەکە دەخاتە ژێر پرسیارەوە

دەستبەسەرکردنی نۆئارین دوای ١١ ساڵ دوورەپەرێزی؛ تاقیکردنەوەیەکی سەخت بۆ "یاسای چوارچێوە"ی تورکیا

لەکاتێکدا پەرلەمانی تورکیا بە زۆرینەی ٤٦٨ دەنگ پرۆژەیاسای "پتەوکردنی یەکگرتووی نەتەوەیی" (یاسای چوارچێوە)ی پەسەند کردووە بۆ ڕەخساندنی زەمینەی پرۆسەی ئاشتی، دەستبەسەرکردنی ژنە هونەرمەندی کورد "نۆئارین" ڕاستەوخۆ دوای گەڕانەوەی بۆ وڵات، دوودڵییەکی قووڵی سەبارەت بە جدییەتی ئەنقەرە لە هێنانەدیی ئاشتیدا دروست کردووە.

دەستبەسەرکردنی هونەرمەند نۆئارین، خەڵکی نوسەیبینی مێردین، لە فڕۆکەخانەی چۆکۆڕۆڤا بە هۆکاری "نهێنیبوونی دۆسیەکەی"، دوای ١١ ساڵ لە نیشتەجێبوونی لە پاریس و دووربوونی لە نیشتمان، شۆکێکی گەورەی بەسەر زەمینەسازییە کۆمەڵایەتییەکانی پرۆسەی ئاشتیدا هێنا.

 نۆئارین کە لە ساڵی ٢٠٠٤ەوە لە ڕێگەی ناوەندی کولتووری میزۆپۆتامیاوە دەستی بە کاری هونەریی کردووە و خاوەنی ئەلبوومی "گەریلا"یە، تەنیا بە مەبەستی ڕەنگدانەوەی کەلتووری گەلەکەی گەڕابووەوە.

ئەم دووفاقییەی نێوان دەقە یاساییەکانی پەرلەمان و ڕەفتاری ئەمنیی دەسەڵات، تەواوی ئەو تێبینییانەی سەلماند کە ڕەخنەگرانی پرۆسەکە ئاماژەیان پێ دەکرد. لەم چوارچێوەیەدا، مستەفا قەرەسوو ئەندامی کۆنسەی بەڕێوەبەریی کەجەکە لەبارەی یاسای چوارچێوەوە ئاماژەی بەوە کردبوو یاساکە کەموکوڕیی جددی تێدایە و وتبووی: "سەرکەوتنی ئەم دەستپێکە بەستراوەتەوە بە هەنگاوەکانی دیموکراتیزەبوون و گۆڕینی زمانی دەسەڵات".

دەستگیرکردنی نۆئارین پرسیارێکی جەوهەریی لەناو ڕایگشتی و هێزە سیاسییەکاندا دروست کردووە: ئەگەر دەسەڵاتدارانی تورکیا لەگەڵ ژنە هونەرمەندێکدا کە تەنیا چەکی هونەری بەدەستەوە بووە وەها ڕەفتار بکەن، ئەوا گەرەنتییەکانی بەردەم گەڕانەوەی گەریلاکانی سەر چیا و چالاکوانانی سیاسی چین؟

ئەم ڕووداوە جەخت لەسەر ئەو ڕاستییە دەکاتەوە، پەسەندکردنی یاسا بە تەنیا بەس نییە، بەڵکو بەبێ بەشداریی ئازادانەی عەبدوڵڵا ئۆجەلان و ڕاگرتنی گۆشەگیرکردنی کەسایەتییە کەلتوورییەکان، مەحاڵە متمانە بۆ پرۆسەی ئاشتی بگەڕێتەوە.