زیاتر لە سێ ملیۆن زیارەتکاری شیعە هاتوونەتە عێراق

ناوەندی هەواڵ

دەستەی دەروازە سنوورییەکانی عێراق ئاشکرایکردووە، لە ماوەی 18 رۆژی ڕابردوودا، زیاتر لە سێ ملیۆن و 300 هەزار زیارەتکار، بۆ بەشداریکردن لە چلەی ئیمام حوسەین، گەیشتونەتە عێراق.

ئەمڕۆ شەممە، 24-8-2024، دەستەی دەروازە سنوورییەکانی عێراق لە راگەیەندراوێکدا ڕایگەیاندووە، لە رۆژی 6ـی ئەم مانگەوە، تا 23ـی ئەم مانگە، سێ ملیۆن و 367 هەزار و 449 کەس لە دەروازە سنوورییەکانەوە هاتوونەتە عێراق.

ئەو زیارەتکارانە لە دەروازە سنوورییەکانی، سەفوان، شەلامجە، شیب، زەرباتیە، مەنزوریە، قائیم، فڕۆکەخانەی بەغدا، فڕۆکەخانەی نەجەف لە سنووری عێراق، دەروازەکانی حاجی ئۆمەران و باشماخ لە هەرێمی کوردستانەوە هاتوونەتە عێراق.

ژمارەی ئەو کەسانەی کە لە رێگەی ئەو دەروازانەوە عێراقیان بەجێهێشتووە، دوو ملیۆن و 221 هەزار و 70 کەس بوون.

بڕیارە سبەی یەکشەممە، رێوڕەسمی چلەی ئیمام حسێن لە عێراق بەڕێوەبچێت، پێشبینی دەکرێت، هاوشێوەی ساڵانی رابردوو، ملیۆنان کەس بەشداری لەو رێوڕەسمەدا بکەن.