سەدر حیزبوڵڵای لوبنان بە سوپای مەهدی ناودەبات

ناوەندی هەواڵ

ڕێبەری ڕەوتی سەدر، دەستخۆشی لە هێزەکانی لوبنان دەکات لە ڕووبەڕووبوونەوەی دوژمنی زایۆنی و دەڵێت: هەروەک چۆن سوپای مەهدی لە ساڵی 2003دا بە تەنیا لە بەرەنگاربوونەوەی داگیرکاریدا بوو بەهەمان شێوە ئێوە ئەوە دەکەن.

ئەمڕۆ یەکشەممە، موقتەدا سەدر، ڕێبەری ڕەوتی سەدر، لە تویتێکدا لە تۆڕی کۆمەڵایەتی "X" ڕاگەیاندراوێکی بڵاوکردووەتەوە و دەڵێت: "چونکە دەزانین تەنها بوون لە گۆڕەپانی ململانێکاندا مانای چییە، لە خودای گەورە دەپاڕێینەوە بۆ پاراستنی لوبنانی خۆشەویست و گەلە گەورەکەی و موجاهیدنە بەڕێزەکانی لە هەموو خراپەیەک، بۆ ئەوەی لە دەستدرێژیی شەڕی زایۆنی ڕزگاری بێت".

لە دوای هێرشەکەی 7ی ئۆکتۆبەری بزووتنەوەی حەماسەوە، ئیسرائیل هێرشێکی کاولکاریی بۆ سەر کەرتی غەززە دەستپێکردووە و تا ئێستا زیاتر لە 40 هەزار کەس کوژراون و زیاتر لە دەیان هەزاری دیکەش برینداربوون.