دادگای تاوانەکانی دژە گەندەڵی فەرمانی دەستگیرکردنی بۆ نور زوهێر دەرکرد

ناوەندی هەواڵ

سەرچاوەیەکی دادوەری ئاشکرایکردووە، دادگای تاوانەکانی بەرەنگاربوونەوەی گەندەڵی فەرمانی دەستگیرکردنی بۆ نور زوهێر دەرکردووە کە تۆمەتباری سەرەکی دزی سەدەیە.

ئەمڕۆ سێشەممە، 27-8-2024، دادگاییکردنی نور زوھێر بەبێ ئامادەبوونی خۆی لە بەغداد بەڕێوەچوو، بەپێی ماددەی 331، لە یاسای سزادانی عیراقی، کە تۆمەتباری سەرەکی دزینی دوو ملیار و 500 ملیۆن دۆلاری دەستەی گشتی باجەکانە کە بە "دۆسێی دزیی سەدە" ناسراوە.

مستەفا سەندە ئەندامی ئەنجومەنی نوێنەرانی عیراق ڕایگەیاندووە، دادگای تاوانەکانی روبەڕوبوونەوەی گەندەڵی بڕیاریدا بە دەستگیرکردنی نور زوھێر، وادەی بۆ دیاریکراوە کە دەبێت رادەستی دادگا بکرێت.

نور زوھێر، لە ناوچەی حەدات لە بەیروت تووشی ڕووداوی ھاتووچۆ بوو و بە سەختی بریندار بوو، دەوترێت لە ئێستادا لە نەخۆشخانەیە بەڵام نازانرێت لە چ وڵاتێک.

هاوکات دەستەی دەستپاکی عیراق رایگەیاند، ژمارەی ئەو کەسانەی لە دزیی سەدە تێوەگلاون تا ئێستا گەیشتووەتە ٣٠ کەس.