سەربازە سورییەکانی ناو عێراق داوای گەڕانەوە بۆ وڵاتەکەیان دەکەن

ناوەندی هەواڵ

ئەو سەرباز و ئەفسەرانەی سوپای سوریا، کە لە ڕۆژی 7ى ئەم مانگەدا لە دوای ڕووداوە ناوخۆییەکانی سوریا هاتنە ناو عێراقەوە، داوای گەڕانەوە دەکەن بۆ وڵاتەکەیان.

ڕوانگەی سوری بۆ مافەکانی مرۆڤ بڵاویکردەوە، ئەو سەرباز و ئەفسەرانە سەر بە لیوای 103ى گاردی کۆماری و پاسەوانی سنوور و گومرک بوون و ژمارەیەک هاوڵاتی فەرمانبەری مەدەنیشیان لەگەڵدایە، لە ڕاگەیەندراوێکدا، داوایان کردووە، پەیوەندیی بکەن بە باڵیۆزی سوریاوە لە عێراق، بە مەبەستی گفتوگۆکردن سەبارەت بە چۆنێتی گەڕانەوە بۆ سوریا.

بە گوێرەی هەواڵەکەی ڕوانگەی سوری بۆ مافەکانی مرۆڤ، تا ئێستاش بە سەدان ئەفسەر و سەرباز لە ناوخۆیی خاکی سوریادا، چارەنووسیان نادیارە، بە تایبەت دوای ئەوەی لە ناوچەی بادیەی سوریا دیارنەماون و نازانرێت دەستبەسەر کراون یان نا.

ڕۆژی 7ى ئەم مانگە زیاتر لە دوو هەزار سەرباز و ئەفسەری سوپای سوریا، بە ئاراستەی سنوری عێراق پاشەکشەیان کرد، دوای هەماهەنگی لەگەڵ هێزەکانی سوریای دیموکراتی، توانییان بپەڕنەوە بۆ سنوری عێراق، دواتریش لەسەر فەرمانی محەمەد شیاع سودانی، سەرۆک وەزیرانی عێراق هاتنە ناو خاکی عێراقەوە لە سەربازگەیەکی سوپا لە سنوری خۆرئاوای عێراق دانران.