عیراق داوا دەکات لێبوردنی گشتی بۆ سەربازە سورییە گەڕاوەکان دەربکرێت

ناوەندی هەواڵ

ئەو سەربازانەی سوریا کە لەکاتی ڕووخانی دەسەڵاتی بەشار ئەسەد دا ڕوویان لە عێراق کردبوو نێردرانەوە بۆ سوریا، عێراقیش دەڵێت داوا لە دەسەڵاتدارانی سوریا دەکەین لێبوردنی گشتیان بۆ ئەو سەربازانە دەربکرێت کەژمارەیان هەزار و 905 سەربازە.

شانەی ڕاگەیاندنی ئەمنی عیراق ڕایگەیاند، لە ڕۆژی 7ی ئەم مانگە، ژمارەیەک لە ئەندامانی سوپای سوریا لە ئەفسەر و پلەباڵاکان، لەڕێگەی دەروازەی ئەبوکەمالەوە داوای هاتنە ناو خاکی عێراقیان دەکرد، دوای وەرگرتنی ڕەزامەندی فەرمی ڕێگەیان پێدرا بێنە ناو خاکی عێراق و لەلایەن وەزارەتی بەرگریی عێراقەوە جێگەیەک بۆ ئەو سەربازانەی سوریا ئامادەکرا و سەرجەم کەلوپەل و پێداویستییەکیان بۆ دابین کرا.

  شانەی ڕاگەیاندنی ئەمنی عیراق ئاماژەی بەوەشکردووە ، لەسەر بنەمای داواکاری گەلی سوریا ئەمڕۆ لەڕێگەی دەروازەی قائیمەوە لەسەر خواستی خۆیان، هەزار و 905 ئەفسەر و ئەندامی سوپای سوریا، کە لە عێراق بوون نێردرانەوە وڵاتی خۆیان.

شانەی ڕاگەیاندنی ئەمنی عیراق دەڵێت،"داوا لە دەسەڵاتدارانی ئێستای سوریا دەکەین ئەو سەربازانەی گەڕاونەتەوە لێبووردنیان بۆ دەربکرێت و بە سەلامەتی بگەڕێندرێنەوە ناو خێزانەکانیان.

دەشڵێت، سەرجەم ئەو سەربازانە چەکەکانیان لێوەرگیراوەتەوە و لای وەزارەتی بەرگریی عێراقن، لەکاتی پێکهێنانی حکومەتی نوێی سوریا دەگەڕێندرێنەوە".