داوا لە سودانی كراوە حەشدی شەعبی هەڵبوەشێنێتەوە

ناوەندی هەواڵ

ئەمریکا هەوڵدەدات زۆرترین سود لە شكستی حزبوڵا و ڕوخانی ڕژێمی ئەسەد ببینێت، بۆ فشاركردن لە سەرۆكی حكومەتی عێراق بۆ گرتنەبەری بڕیاری هەڵوەشاندنەوەی حەشدی شەعبی كە لەژێر چەتری هێزە حكومییەكاندا كاردەكات، ئەو هەنگاوەی ئەمریکا لێدانی گورزێكی بەهێز دەبێت لە هەژمونی ئێران لە عێراق.

حەشدی شەعبی بە فەتوای جیهادی كیفائی لەلایەن عەلی سیستانی گەورە مەرجەعی باڵای شیعەكانەوە پێكهاتووە، ئەوا هەڵوەشاندنەوەی ئەو میلیشیایەی نزیک لە ئێران پێویستی بە فەتوایەكی نوێی مەرجەعییەتە، كە هانی بەدورگرتنی عێراق دەدات لە دەستوەردانی دەرەكی و دورخستنەوەی لە نەهامەتیەكانی جەنگ.

سەرچاوەکان ئاماژە بۆ ئەوە دەکەن، ڕاگەیاندنی فەتوایەكی لەوشێوەیە بەدور نازانرێت لەبەر ڕۆشنایی ئەو پەیوەندییە دەرەكییانەی لەگەڵ سیستانی ئەنجامدەدرێت، كە دواینیان دیداری نوێنەری ئەمینداری گشتی نەتەوە یەكگرتووەكان بووە، كە لەماوەیەكی كورتدا دووجار سەردانی كردووە و لەدواین سەردانیدا ڕایگەیاندووە بڕیارە یەكلاكەرەوەكان كاتی هاتووە.

سەرچاوە عێراقییە ئاگادارەکان باس لە وەدەکەن، سودانی ڕووبەڕووی دۆخێكی نائاسایی بووەتەوە بەتایبەت دوای دیدارەكەی لەگەڵ وەفدی ئەمریكا بە سەرۆكایەتی ئەنتۆنی بلینكن، كە داوای لێكرد ڕێوشوێنی خێراو یەكلاكەرەوە دژی میلیشیاكان بگرێتەبەر، لە سەرویانەوە بڕیاری هەڵوەشاندنەوەی حەشدی شەعبی و لێدان لەهەر گروپێك كە ڕادەستی چەك بەدەوڵەت ڕەتبكاتەوە.

ئەو هەڵوێستەی ئەمریكا بە میلیشیاكان راگەیەندراوە، هەندێكیان خۆیان ئامادە کردووە بۆ خۆبێبەریكردنی لە ئێران و جەختكردن لەوەی تەنها كار بۆ بەرژەوەندی عێراق دەكەن و، پابەندی بڕیاری فەرمی دەبن لەبارەی دەستوەرنەدان لە سوریا.