ئەمریكا هێڵی سوور بۆ ئەحمەد شەرع دادەنێت

ناوەندی هەواڵ

نێردەی ئەمریكا بۆ كاروباری سوریا ڕایدەگەیەنێت: پێویستە ئەحمەد شەرع، سەرۆك كۆماری سوریا هەڵسەنگاندن بۆ سیاسەتەكانی بكاتەوەو رێبازێكی گشتگیرتر بگرێتەبەر، ئەگەر نا روبەڕوی هەڕەشەی لەدەستدانی پشتیوانی نێودەوڵەتی و پارچەپارچەبونی وڵاتەكەی دەبێتەوە.

تۆم باراك، نێردەی ئەمریكا بۆ كاروباری سوریا، لە چاوپێكەوتنێكدا لەگەڵ ئاژانسی هەواڵی "رۆیتەرز" داوا لە ئەحمەد شەرع، سەرۆك كۆماری سوریا دەكات، هەڵسەنگاندن بۆ سیاسەتەكانی بكاتەوەو رێبازێكی گشتگیرتر بگرێتەبەر، ئەگەر نا روبەڕوی هەڕەشەی لەدەستدانی پشتیوانی نێودەوڵەتی و پارچەپارچەبونی وڵاتەكەی دەبێتەوە، ئەوەش دوای خولێكی نوێی ململانێی تائیفی خوێناوی، كە هەفتەی رابردوو لە سوریا سەریهەڵدا.

نێردەی ئەمریكا بۆ كاروباری سوریا، لە گفتوگۆ تایبەتەكاندا ئامۆژگاری شەرعی كردووە، پێداچوونەوە بە پێكهاتەی سوپاكەیدا بكات و هەژمونی ئیسلامییەكان كەم بكاتەوە و داوای هاوكاری ئەمنی هەرێمایەتی بكات، چونكە بەبێ ئەنجامدانی گۆڕانكاری خێرا، شەرع مەترسی لەدەستدانی ئەو هێزەی هەیە كە هێنایە سەر دەسەڵات.

ئاماژەی بەوەشكردووە,شەرع دەبێت بڵێت بەخێرایی خۆم دەگونجێنم، چونكە ئەگەر ئەوە نەكەم، وزەی ئەو گەردوونە لەدەست دەدەم كە لەپشتمەوە بوون، شەرع دەتوانێت وەك سەرۆكێك پێبگات و بڵێت، كاری دروست ئەوەیە هەمان هەنگاوەكانی پێشوو نەنێم، كە ئامانجی خوازراو بەدیناهێنێت.

نێردەی ئەمریكا لە بەشێكی تری قسەكانیدا باسی لەوەکردووەکە، پێویستە حكومەتی نوێ بیر لەوە بكاتەوە بەشێوەیەكی خێرا گشتگیرتربێت لە تێكەڵكردنی كەمینەكان لە پێكهاتەی حوكمڕانیداو مەترسییەكان لە سوریا لە ڕادەبەدەر بەرزن، بەهۆی نەبوونی هیچ پلانێكی جێنشین و ئەگەری جێگرەوەیەك بۆ حكومەتی سوریا.
ڕاشیگەیاندووە، لەگەڵ ئەم رژێمی سوریایە، پلانی "بی" نییە، ئەگەر ئەم رژێمە لە سوریا شكستی هێنا... كە هەن هەوڵدەدەن بۆ ئەوەی شكست بهێنێت. (بەڵام) بۆ چ مەبەستێك؟ هیچ جێگرەوەیەكی نییە.