تارا ڕەحیمیزاد، پەنابەری سیاسیی کورد و خەڵکی کرماشان کە ماوەی ٢٣ ڕۆژە لەلایەن هێزە ئەمنییەکانی تورکیاوە دەستبەسەر کراوە، دوای گواستنەوەی بۆ کەمپێکی نزیک سنووری ئێران، لەگەڵ مەترسییەکی جیددیی دیپۆرتکردنەوە و ڕادەستکردنەوەی بە دەسەڵاتدارانی تاران بەرەوڕوو بووەتەوە.
«چیرۆکی دەستبەسەرکردن و گواستنەوەی بۆ کەمپەکان»
بەپێی ڕاپۆرتێکی ڕێکخراوی مافی مرۆڤی «هەنگاو»، تارا ڕەحیمیزاد ڕۆژی شەممە ٢ی خەزەڵوەری ٢٧٢٦ (٢٤ی ئۆکتۆبەری ٢٠٢٦) لەلایەن هێزە ئەمنییەکانی تورکیاوە دەستبەسەر کراوە و لەو کاتەوە تا ئێستا بە چەند کەمپێکدا گوازراوەتەوە:
قۆناغی یەکەم: دوای دەستبەسەرکردنی، ڕاستەوخۆ بۆ کەمپی «ئەدیرنە» گواسترایەوە و لەوێ ڕاگیرا.
قۆناغی دووەم: هەفتەیەک دواتر، گواسترایەوە بۆ کەمپی «پەهلەوانکۆی».
قۆناغی کۆتایی (نزیک سنوور): سەرەنجام ڕۆژی سێشەممەی ڕابردوو، لە چوارچێوەی جێبەجێکردنی بڕیاری دیپۆرتکردنەوە بۆ ئێران، لەو کەمپەوە گواسترایەوە بۆ کەمپی «ئاگری» لە پارێزگای ئاگری کە دەکەوێتە نزیک سنووری ئێران.
«پێشینەی سیاسی و مەترسیی سزای قورس»
تارا ڕەحیمیزاد لە ماوەی چەند ساڵی ڕابردوودا وەک چالاکێکی سیاسی و ئەندامی حیزبی دیموکراتی کوردستانی ئێران لە هەرێمی کوردستان نیشتەجێ بووە. ناوبراو بەهۆی گوشارە بەردەوامەکانی ناوەندە ئەمنییەکانی کۆماری ئیسلامیی ئێرانەوە، ناچار بوو بە مەبەستی گەیشتن بە وڵاتێکی ئارام، هەرێمی کوردستان بەجێبهێڵێت.
سەرچاوەکانی مافی مرۆڤ هۆشداری دەدەن کە بەهۆی پێشینەی چالاکییە سیاسییەکانییەوە، لە ئەگەری ڕادەستکردنەوە و گەڕاندنەوەی بۆ ئێران، ژیانی تارا دەکەوێتە مەترسییەوە و ڕووبەڕووی ئەشکەنجە و دەرچوونی سزای قورس و نامرۆڤانە دەبێتەوە لەلایەن ناوەندە ئەمنییەکانی ئێرانەوە.
«هۆشداریی هەنگاو و بانگەواز بۆ ڕێکخراوە نێودەوڵەتییەکان»
ڕێکخراوی مافی مرۆڤی هەنگاو نیگەرانیی قووڵی خۆی لە ئەگەری دیپۆرتکردنەوەی ئەم پەنابەرە سیاسییە دەربڕیوە و بە پشتبەستن بە بڕگەکانی پەیماننامە نێودەوڵەتییەکان، دوو داواکاریی بەپەلە ئاراستە دەکات، داوا لە تورکیا دەکات دەستبەجێ ڕەوتی دیپۆرتکردنەوەی تارا ڕەحیمیزاد ڕابگرێت و بنەماکانی مافی مرۆڤ لە مامەڵەکردن لەگەڵ پەنابەراندا ڕەچاو بکات، داوا لە سەرجەم ڕێکخراوە نێودەوڵەتییەکانی مافی مرۆڤ و بەتایبەت ناوەندەکانی پاراستنی پەنابەران دەکات، هەرچی زووترە بەرانبەر بە دۆخی ئەم پەنابەرە بێنە سەر خەت و ڕێگری لە گەڕاندنەوەی بۆ ئێران بکەن.