وه‌زیرى نه‌وتى عێراق له‌باره‌ى ده‌ستپێكردنه‌وه‌ى نه‌وتى هه‌رێم چەند زانیارییەک ئاشکرادەکات

ناوەندی هەواڵ

ماوەى دوو رۆژە شاندى هەرێمى کوردستان و ئەپیکۆر، لەگەڵ وەزارەتى نەوتى عێراق گفتوگۆکانیان لەبارەى دەستپێکردنەوەى هەناردەى نەوتى هەرێم بەردەوامە، وەزیرى نەوتى عێراقیش دەڵێت، لە گفتوگۆکان لەگەڵ هەرێم سەبارەت بە هێڵى نەوتى عێراق - تورکیا، بەرەوپێشچوون هەیە.

ئه‌مڕۆ دووشه‌ممه‌ 10ى حوزه‌یران، حه‌یان عه‌بدولغه‌نى، وه‌زیرى نه‌وتى عێراق له‌ نوێترین لێدوانى بە ئاژانسى هەواڵى فەرمیى عێراقى راگەیاندووە، بۆ دەستپێکردنەوەى هەناردەى نەوت بۆ بەندەرى جەیهان، گفتوگۆ لەگەڵ تورکیا دەکەن  و لەگەڵ هەرێمیش لەبارەى هێڵى نەوتى عێراق - تورکیا، بەرەوپێشچوون هەیە.

وتیشى، رۆژانە چوار ملیۆن بەرمیل نەوت بەرهەمدەهێنن و سێ ملیۆن و 400 هەزار بۆ سێ ملیۆن و 450 هەزار بەرمیل هەناردە دەکرێت و هەوڵەکانیشیان بەردەوامە بۆ ئەوەى  دەروازەکانى هەناردەکردنى نەوت بۆ بازاڕەکانى جیهان زیاد بکەن و پێش راگرتنى، رۆژانە 400 هەزار بەرمیل نەوتیان هەناردەى بەندەرى جەیهانى تورکیا کردووە.

بەوتەى وەزیرى نەوت رۆژانە 21 ملیۆن لیتر بەنزین بەرهەمدەهێنن، بەڵام 28 ملیۆن لیتر بەکاردەهێنرێت، نرخى بەنزین لە عێراق لە زۆر وڵاتى دیکە هەرزانترە و ئەمساڵ لە بەرهەمهێنانى بەنزیندا دەگەنە ئاستى خۆبژێوى.

لەبارەى ‌گازى سروشتى، حەیان عەبدولغەنى ئاماژەى بەوەکردووە، رێژەى وەبەرهێنانى گازى سروشتى بۆ 63% بەرزبووەتەوە و گەیشتووەتە هەزار و 900 ملیۆن پێ سێجا، پلانیشیان هەیە تاوەکو ساڵى 2028 رێژەى سووتاندنى گازى هاوەڵ بۆ 0% کەمبکەنەوە.